Според досегашните податоци на полицијата 51 лице починало, а повеќе од 100 се повредени и пренесени во болниците во Кочани, Штип и Скопје, соопшти на прес-конференција министерот за внатрешни работи Панче Тошковски.
Министерост Тошковски, заедно со директорот на Центарот за управување со кризи и директорот на Бирото за јавна безбедност Александар Јанев, се наоѓаат во Кочани неколку часа откако во раните утрински часови во дискотеката „Пулс“ во градот на истокот избувнал пожар во кој починаа и беа потешко повредени стотина присутни.
Причината за пожарот, според првичните информации кои ги соопшти Тошковски се дека настанал од искри од приотехнички средства, кои биле употребени за светлосен ефект на концертот на групата ДНК.
– „Во моментот на активирање на прскалките, најверојатно искрите го зафатиле таванскиот дел кој е од лесно запалива материја и за кратко пожарот се проширил низ цела дискотела и се создал густ чад. За кратко време се пристигнати противпожарни служби од околните градови, амбулантни возила, а активирани се и хеликоптери на МВР за транспорт на повредените на скопските клиники“, изјави Тошковски.
Пожарот избил синоќа околу 3 часот по полноќ.
Во дискотеката имало околу 1500 млади. Кога започнал пожарот луѓето внатре почнале да ги кршат прозорите. Но, на прозорите имало решетки и не можеле да излезат од таму. Од дискотеката која била во приватна куќа во предградието на Кочани имало само еден влез и излез.
Жители кои ја посетувале дискотеката сведочат дека станува збор за простор кој има тесен простор за влез и излез, каде имало стампедо кога настанал пожарот.
View this post on Instagram
Министерот посочи дека починати лица има во повеќе болници во Северна Македонија, кои по нивна идентификација мора да бидат однесени на обдукција.
– „Преку Оперативниот штаб дадено е напатствие до сите клиники и болници каде има починати лица, по идентификација на загинатите лица е да ги известат семејствата. Мора да се постапи по насока на обвинител и мора да се изврши обдукција на секое починато лице“, додаде Тошковски.
Во однос на одговорноста за несреќата, минитерот рече дека дел од лицата „се во рамки на соодветна постапка, се приведени и се вршат разговори со нив“, а организаторите на настанот се дел од тешко повредените на оваа несреќа.
– „Во оваа прилика сакам да изразам најискрено сочувство за најблиските на загинатите во оваа трагедија“, рече министерот.
Утринава, се огласија и од Обвинителството, од каде велат дека точниот број на жртви и повредени допрва ќе се утврдува.
– „Сите надлежни служби, вклучително и јавен обвинител од ОЈО Кочани се на терен. Бројот на жртви и повредени се утврдува. Се уште се преземаат дејствија и се врши увид. На кочанското обвинителство ќе му бидат на располагање сите капацитети на обвинителствата за итно постапување“, соопштија од ОЈО.
МВР и ОЈО координирано работат на терен и најавија дека подоцна ќе излезат со подетални информации.
Вака изгледала огнената ноќ во Кочани:
