Попладнево, во атарот на селото Јосифово, општина Валандово избувна пожар во реонот кај депонијата по што зафати простор на сува трева, а пожарот помогнат од присутниот ветер продолжи да се шири со можност да ги загрози и опожари првите куќи од селото.
Први не терен пристигнаа ТППЕ Валандово со 4 возила и 7 пожарникари и ТППЕ Гевгелија со 1 возило и 3 пожарникари.
Ветрот ја загрозуваше станбената област на селото Јосифово, насочувајќи го огнот кон куќите, поради што по барање на градоначалникот, преку бројот за итни повици 112, побарана е воздухопловна поддршка и дополнителни тимови за справување со пожарот.
Веднаш се активираше ЦУК и ДЗС кои во содејство со МВР испратија воздушна поддршка, односно беше ангажиран хеликоптер за гаснење од воздух.
Некаде кон крајот на денот силите на ТППЕ Валандово, ТППЕ Гевгелија и хеликоптерот на МВР ја завршија акцијата за гаснење и селото можеше да здивне од огнената закана – пожарот е изгаснат пред да настапи мракот.
Вака изгледаше на терен:
Градоначалникот на Валандово, Перо Костадинов упати благодарност сите вклучени во гаснењето на разорниот пожар во Јосифово:
– „Голема благодарност до месното население, ТППЕ Валандово и Гевгелија, ЈП Комунален Сервис, МВР Валандово, ЦУК, ДЗС, Здравствен дом – Валандово, како и до сите други институции и граѓани коишто денес се вклучија во справувањето со разорниот пожар во Јосифово“ – напиша Костадинов на социјалните мрежи.
Ова е првиот поголем пожар на отворен простор во државата за оваа година и уште еднаш не’ потсети дека треба внимателност и одговорност во грижата за природата за време на летните месеци кога поради топлото време присутни се и пожарите
Од Центарот за управување со кризи АПЕЛИРААТ:
🔺 Бидете внимателни при движење и престој во природа.
🔺 Не палатe стрништа, отпад или огнови на отворено без контрола.
Само со одговорно однесување можеме да ги спречиме пожарите кои претставуваат сериозна опасност за луѓето, имотот и природата.
Од ЦУК известуваат дека во текот на денешнит ден имало регистрирани 25 пожари од кои 23 се изгаснати, а активни се 3 пожари.
