Деветнаесетгодишниот Мехмед Хасанамиџиќ загина откако влезе во обележано минско поле во близина на Добој, во централна Босна и Херцеговина. Според првичните информации, младиот човек се обидувал да ги врати козите што залутале во опасната зона, по што се случила експлозија.
Мајката на настраданиот, Ферида Хасанамиџиќ, за „Аваз“ изјави дека семејството живее од напорна работа и дека синот често одел да се грижи за добитокот во близина на минските подрачја. „Одеше таму горе да се грижи за козите што често талкаат во минските полиња. Се обидуваше да ги врати. И тогаш нешто пукна“, рече таа.
Семејството живее во селото Хоџиќи, од каде што Бошњаците беа протерани за време на војната, но дел од жителите се вратија по нејзиниот крај. Локални жители сведочат дека и претходно имало загинати и тешко повредени од мини во околината.
Според податоците на Центарот за деминирање на БиХ (BHMAC), од крајот на војната во земјата од мини и други неексплодирани убојни средства страдале 1.781 лице, од кои 624 починале. Меѓу загинатите се и 53 деминери ангажирани на расчистување на теренот. Проценките укажуваат дека повеќе од 800 квадратни километри во БиХ и натаму се мински сомнителни подрачја, со проценка дека се наоѓаат над 170.000 мини. Повеќе од 132.000 луѓе живеат во близина на овие опасни области.
Надлежните служби апелираат граѓаните строго да ги почитуваат ознаките за минска опасност и да не се движат надвор од безбедносно означените патеки, особено на рурални локации со пасишта и шумски појаси. Истрагата за инцидентот е во тек.
