Новата учебна 2023/24 година за првачињата од општина Дојран ќе значи и поддршка од општината за нивната подготовка за влез во светот на образованието. Секое семејство со прваче ќе добие еднократна парична помош од 4.000 денари.
Ова денеска го објави градонаалникот на општина Дојран Анго Ангов, кој истакна:-
– „Децата се нашето најголемо богатство, тие се нашата надеж и нашата иднина.
Токму затоа, одлучивме од оваа учебна година да доделиме еднократна парична помош во висина од 4.000 денари за поддршка на нашите првачиња кои го започнуваат своето образовно патување овој септември!
Секое семејство кое живее на територијата на Општина Дојран, со дете кое веќе уредно е запишано во О.О.У „Кочо Рацин“ Нов Дојран, односно во некое од подрачните училишта во населените места од општината, има можност да добие еднократна исплата од 4.000 денари!“ – објасни градоначалникот Ангов.
За да се добијат средствата родителите/родител на првачето треба да ги достават псновните податоци за да биде регулирана исплатата со приложување до Општина Дојран на следните документи:
🔹 Извод од матична книга на родените на детето;
🔹 Број на трансакциска сметка на родителот;
🔹 Копија од лична карта на еден од родителите;
🔹Потврда за запишан ученик во прво одделение во учебната 2023/24 година.
Во оправданоста на оваа финансиска помош за првооделенците, Ангов додаде:
– „Ја разбираме важноста да се обезбеди силна основа за образованието на нашите деца и оваа иницијатива е наш начин да ги поддржиме семејствата кои оваа година имаат првоодделенче. Ние сме овде да ги поддржиме нашите најмали и најмили за да ги направат првите чекори во светот на формалното образование“.
Среќно на првачињата во Дојран и честитки за олеснетите подготовки за почеток на учебната година за родителите на првачињата. Дојран мисли на своите мили и најмили.
