Земјоделците од северниот дел на Грција, за утре напладне закажаа протест на граничниот премин Евзони, Богородица кон Македонија со што од 12-12.30 сообраќајот ќе биде блокиран , велат дека нема да отстапат од нивните барања сè додека не бидат целосно исполнети.
Во моментов на Евзони се паркирани околу 100 трактори и пет комбајни.
– „Утре ќе се одржи голем земјоделски собир на граничниот премин Евзони со учество на активните блокови од областа централна Македонија, но ќе дојдат и други, од подалеку. Ќе започне околу 13-13:30 часот и ќе заврши според тоа колку говори ќе има, немаме одредено време кога ќе заврши, но сигурно ќе трае два-три часа“ – вели Томас Карпидис претседател на земјоделското здружение од областа Пеониа.
Според најавите граничниот премин ќе биде затворен, се очекува големо учеството на земјоделци со земјоделски возила, блокадата ќе трае сè додека не заврши протестот. Инаки по големиот протест во вторникот во Атина, кога земјоделците рекоа дека секој блок посебно ќе ги одреди своите чекори, земјоделците од Северна Грција се најактивни.
– „Ние се бориме за нашите права, сакаме владата да ни’ даде решение за нашите проблеми“;
– „Тие мислат дека ни’ понудиле многу работи, но ние се обидуваме да понудиме поефтини продукти за граѓаните“ – се дел од реакциите на грчките земјоделци.
Грчките земјоделци од северниот дел на земјата, вечерва го блокираа преминот Евзони (Богородица) кон Северна Македонија за влез на товарни возила.
Веста за МИА ја соопшти началникот на Регионалниот центар за гранични работи „Југ“ при МВР, Славчо Богев.
- „Преминот Евзони е блокиран од 18:30 часот за влез на товарни возила и според информацијата од грчка страна блокадата ќе трае еден час, односно треба да заврши во 19:30 часот по македонско време“, изјави Богев.
За времетрањето на блокадата не се пропуштаат камионите, односно како што беше порано кога на секои половина час по десет минути се пропуштаа возила.
