Случајот со бебето кое во градинка добило гребаници на лицето, како лесни телесни повреди констатирани во медицински наод од лекар, но коj кај вознемирените родители предизвика лавина од медиумски реакции, дури и од пратеничка на ВМРО-ДПМНЕ од Гевгелија, денеска со инспекцискиот надзор од МТСП се констатира дека е постапено согласно законот за заштита и згрижување на деца.
Против двете негувателки задолжени за групата за згрижување на деца до 2 годишна возраст во клонот „Цветови“ во Гевгелија е покрената дисциплинска постапка за кое завчера (23.11.2022 г.) е доставен предлог од директорката на ЈОУДГ „Детска радост“ Гевгелија, Екизабета Стојменова.
Ова е констатирано и во Записникот од денешниот инспекциски надзор во клонот „Цветови“ срочен од страна на надлежен инспектор од Министерството за труд и социјала кој беше на лице место за да ја утврди фактичката состојба за настанот кој се случил во вторникот (22.11.2022 г.) , а го објави опозициската ВМРО-ДПМНЕ.
„Директорката на Јавната општинска установа за деца, градинка „Детска радост“ Гевгелија, поднела предлог за поведување на дисциплинска постапка против негователките и донела Решение за формирање на комисија за утврдување на повреда на работната дисциплина. При вонредниот инспекциски надзор е утврдено дека директорот постапил согласно одредбите од Законот за заштита на децата. Според дадените изјави на негувателките, детето се стекнало со гребнатинки при пад во игра со останатите деца кои биле санирани, а мајката ја информирале при преземањето на детето од установата“, соопшти Министерството.
Случајот од вторникот, вчера беше пријавен и во полицијата од страна на таткото на бебето, лицето Т.Н. (24 год.) од село Брајковци. Тој во пријавата навел дека вработените во градинката ја запоставиле својата должност и ја оставиле неговата десетмесечна ќерка без надзор кога била повредена.
Од МТСП апелираа до политичките партии да не се користат децата за партиски цели, при што ги демантираа изјавите од ВМРО-ДПМНЕ дека инволвираните во случајот „го криеле бруталното насилство врз десетмесечно бебе во градинката“. Од ВМРО-ДПМНЕ денеска побараа одговорност од негувателките, разрешувањена директорката Елизабета Стоименова и оставка од министерката Јована Тренчовска.
Од почетокот на годинава, МТСП ѝ ги одзеде ингеренциите на Општина Гевглија и на градоначалникот Сарамандов за ЈОУДГ „Детска радост“ – Гевгелија, после непостапувањето во три наврати на законски надлежности во сферата на заштитата на децата што ги имаат локалните самоуправи согласно процесот на децентрализација во државата.
