Иако на празничен ден, посветениот тим на СОС Детско село од Скопје вчера беше во работна посета на југот, во општините Дојран и Богданци каде постави свои штандови за поддршка за згрижувачки семејства во Македонија кои ќе го отворат својот дом за грижа на деца без родители.
Празнично и работно тие се среќаваа со граѓаните од локалните средини со цел да им испорачат честитка насловена како „Прегратка за рамноправност!“ и виолетови ружи и лалиња, цветови со меѓународната боја на рамноправноста.
Во Македонија оваа хумана згрижувачка мисија на деца без родители прифатиле да ја обавуваат 286 жени, а само 77 мажи. Тоа значи дека од вкупниот број на 363 активни згрижувачи во Македонија 73% се жени, а само 21% машки згрижувачи, што е статистика која ги отсликува половите стереотипи во однос на тоа дека грижата за децата е обврска на жените.
Тимот на СОС „Детско село“ преку штандот „Стани згрижувач“ во 8-мо Мартовскиот празничен ден ги повикаа граѓаните на Богданци и Дојран кои имаат желба и услови да станат згрижувачи на деца без родителска грижа да се приклучат на оваа хумана визија обезедувајќи топол дом на децата кои сега го немаат тоа.
Да се стане згрижувач значи да се стане подобра верзија од себе, отварајќи го срцето и домот за дете на кое му е неопходна родителска грижа, зошто секое дете без родители заслужува да живее со лица кои ќе сакаат да пружат родителска грижа, зошто во семејство поубаво, похумано и пољубено се расте.
За целта и опфатот од оваа хумана активност за читателите на GevgelijaNet.com зборуваа: Александра Ивановски – Раководител на Центарот за поддршка на згрижувачки семејства при СОС Детско село, Васка Илиева – директор на Центарот за социјални работи во Гевгелија, Стојан Стаменковиќ – претставник на Општина Богданци и Јагода Насковска – Супервироз во Ценатрот за поддршка на згрижувачки семејства при СОС Детско село – Скопје.
Сите заинтересирани да се вклучат во оваа хумана мисија за повеќе информации за згрижувачките семејства можат да ја посетат страницата https//zgrizuvanje.mk или Fb.com/zgrizuvanje.mk или да се обратат за повеќе информации на телефонскиот број 075/277-447.
Секое дете заслужува да расте со насмевка!
