Од „Драмски театар“ – Скопје информираа дека на 78 години почина македонскиот театарски, филмски, телевизиски актер и хуморист, Димче Мешковски.
Мешковски е роден е на 31 октомври 1945 година во Скопје . Целиот актерски век го помина во Драмски театар – Скопје, а остана препознатлив по неговите улоги во претставите „Диво месо“, „Солунски патрдии“ и „Хамлет од Долно Гаштани“.
Неговиот лик беше препознатлив и по улогите на телевизиските продукции, како серијалите „Македонски народни приказни“, Солунски патрдии“, „Чук-чук Стојанче“, „Викенд на мртовци“, „Трст виа Скопје“, „Големи и мали“, „Во светот на бајките“…
Тој ќе остане запаметен и по улогите во филмовите „Републиката во пламен“, „Македонски дел од пеколот“, „Колнати сме, Ирина“, „Шеќерна Приказна“, „Диво месо“, „Среќна нова ’49“, „Болва во уво“, „До балчак“, „Трето полувреме“, и „Викенд на мртовци“, но и радио-драмите и хумористичните серии „Хихирику“.
Својот глас го позајмувал и при натсинхронизацијата на цртани филмови како Гаргамел во „Штрумпфови“, во „Попај“, а познат е и по улогата на Дедо Мраз во новогодишните претстави за деца.
Добитник е на повеќе награди, како „13-ноември” и „Ристо Шишков”, како и наградата „Војдан Чернодрински“ за животно дело.
Од „Драмски театар“ известуваат дека комеморацијата ќе се одржи во салонот на Драмски театар на 28 март во 12 часот напладне.
За здравствените проблеми, не криеше дека листата е долга, но храбро се носи со нив. Преживеал мозочен удар, одел на дијализа, имал четири бај-паса, опериран колк… Не криеше и дека е горд на ќерките Јасна и Наташа, како и на внуката, на која и беше посветен во последните години.
Мешко зад себе има над 6.000 одиграни претстави, а заедно со колешката Мара Попара, која почина пред неколку месеци, имале повеќе турнеји во Австралија, Канада и Америка.
Лани по четири години минати во САД се врати во Македонија и раскажа дека е среќен што луѓето уште го препознаваат.
