Танцовото студио „Mystic dance“ од Гевгелија под раководство на Александар Аврамов деновиве се врати со шест освоени златни пехари и 51 златни медали од учеството на „International dance open Belgrade 2023“ кој се одржа во Србија.
Вкупно учествуваа 37 девојчиња и сите се закитија со злато, но младинскиот состав (14 членови) настапи 2 пати и сите освоија по две златни медали од своите златни настапи на подиумот.
Менторот и кореограф Александар Аврамов, за овој значаен успех за GevgelijaNet.com изјави:
– „На последното издание на „International dance open Belgrade 2023“ освоивме 6 први места во сите категории во кои се пријавивме, и тоа:
– Соло бејби хипхоп,
– Соло мини деца хипхоп,
– Група деца Хипхоп,
– Формација деца „Стрит шоу“,
– Формација Младинци хипхоп и
– Формација Младинци „Стрит шоу“.
На натпреварот учествуваа 37 членови на студиото во четири возрасни категории и својата танцова доминација ја истакнаа пред 3.000 натпреварувачи од девет земји кои учествуваа на интернационалниот денс подиум.
Ја издвојуваме најмалата од учесничките и наградените на натпреварот во Белград – тоа е 5-годишната Матеа Џурановиќ Костадинова која позира со освоениот трофеј и знамето на „Мистик денс“.
– „Мистик студиото постои од почетокот на 2008 година, најпрво како секција за урбани танци во состав на Пионерски дом Гевгелија. Како основач и кореограф на студиото можам да кажам дека изминативе 15 години сме работеле на неколку стотици кореографии и секоја кореографија која била јавно изведена е наше оригинално дело. Децата ја следат урбаната музика и преку танцот се обидуваме да ги поттикнеме да ја доживуваат истата малку поактивно; свесни сме дека децата поминуваат предолго време во неактивност, па преку музика и танц допринесуваме за нивно правилно развивање“ – ни’ изјави Аврамов за потикот и мотивите да работи со децата во областа на танцот.
Ви претставуваме уште една мала носителна на златен трофеј од танцовиот натпревар во Белград, тоа е 6-годишната Елизабета Капсарова.
Нема промашување и во претставувањето на формацијата со Мистик Кидс во категоријата “MTV commercial formation kids”.
Еве ја целокупната гордост од фестивалската жетва на награди на „Мистик денс“ од Гевгелија на подиумот во Белград.
– „Особено сме горди на двете учества на гала-настанот. Се надеваме дека во блиска иднина ќе се најдеме и на пиедесталот на овие вечери, изјави по натпреварот Аврамов. Особено е голема гордоста што нашите деца без проблем се искачија до врвот освојувајќи го ПРВОТО МЕСТО и се пласираа во „ТОП 30“ најдобри настапи на @internationaldanceopen во категоријата “hip hop formation kids” – изјави Аврмов.
Со 15 годишната танцова традиција зад себе ова не е прво злато за гевгелискто танцово студио, но е дефинитивно најбројната „Златна жетва на награди“ на еден Интернационален фестивал. За постигнувањата, за наградите, за трофеите Александар Аврамов скромно изјави:
– „Мистик студио подолго време е дел од домашните и меѓународните натпревари. Наградите ни’ се секогаш драги, но и поразите се тука да не’ научат да работиме подобро. Покрај натпреварите, секогаш најголемо внимание им придаваме на настапите пред домашната публика, како на поголемите спортски настани, а особено завршните концерти на студио „Мистик“ кои традиционално се одржуваат секоја година во втората половина на месец јуни.
Честитки за гевгелиските прваци!
