Министерството за транспорт и врски денеска изврши прелиминарна распределба на социјалните згради во Гевгелија и Демир Капија.
Комисијата при Министерството за утврдување на електронска распределба на социјалните станови денеска беше на презентација на прелиминарната ранг листа на лицата, семејствата кои ги исполнуваат условите по веќе завршениот Јавен конкурс. Презентацијата се изврши во Народниот театар во Гевгелија, на која присуствуваа, беа поканети лицата кои доставија свои апликации до Министерството.
Од вкупно 52 стана во социјалната зграда во Гевгелија, можно е да бидат распределени само 32 стана, засега, бидејќи толку апликанти ги задоволиле (исполниле) зададените услови во јавниот конкурс за распределба на социјалните станови.
– „На прелиминарната листа со комплетна документација се најдоа 32 семејства, кои во наредниот период ќе бидат посетени од комисијата, по што ќе биде утврдена конечната листа на семејства кои ќе добијат социјални станови“ – изјави денеска министерот за транспорт и врски Благоја Бочварски при посетата во Гевгелија.
– „Никој нема да биде оставен сам, продолжува нашата грижа за најранливите категории на граѓани. Особено ми е драго кога политиките кои ги водиме носат резултати и ова е пример за нашата вистинска грижа, за обезбедување на хумани услови и достоинствен живот за граѓаните на кои тоа им е најпотребно. Тоа е наша обврска, а среќни граѓани е мотивација повеќе да работиме на подобрување на животниот стандард и подобра иднина за сите”, изјави министерот Бочварски во Гевгелија.
По извршената прелиминарна распределба, Комисијата за станбени прашања на терен ќе изврши веродостојност на доставената документација и фактичката состојба. Конечната листа на семејства што ќе добијат социјални станови ќе биде утврдена по завршувањето на теренскиот увид, велат од Министерството.
