Осум деца, припадник на обездедувањето и професорка се убиени кога 14-годишно момче пукаше во белградското основно училиште „Владислав Рибникар“, јави Б92, потенцирајќи дека засега нема официјална потврда.
Момчето упаднало на час по историја и почнало да пука кон учениците, потврдено за Б92.
Едно дете е животно загрозено и во моментов е на операција каде му се третира повреда на главата. Други две деца се хоспитализирани со прострелни рани и во моментот се на интензивна нега.
Напаѓачот е уапсен.
Полицијата го откри неговиот идентитет. Коста Кецмановиќ (14) кој утрово во ОУ „Владислав Рибникар“ уби најмалку 6 школски другари, наставничка и чувар пишува nova.rs.
Како што пишуваат медиумите во Србија тој учествувал на многу натпревари по математика и добивал награди. Минатата година освоил и трето место на општински натпревар по историја.
Вработени во училиштето, пак, за новинарот на РТС рекле дека наставничката по историја Т. С. го прозвала напаѓачот, ученик од VII-2 клас, да одговара и тој потоа пукал во неа.
Училишниот чувар и дежурните ученици го слушнале пукањето и отишле да видат што се случува, а потоа напаѓачот пукал и во нив.
Учениците од другите паралелки се затвориле во училниците, додека некои деца во општата паника се обиделе да го напуштат училиштето преку друг влез.
Освен момчето, уапсено е уште едно лице, објавија српските медиуми.
Полицајци со специјална опрема ја затворија целата област околу основното училиште кое се наоѓа во населбата Врачар. Училиштето е оградено со лента, а се пропуштаат само родителите кои трагаат по своите деца. Полицијата ги прозива родителите по одделенијата во кои одат нивните деца, а дел од родителите плачат и ги гушкаат децата, јави агенцијата Бета.
