Цвеќе за патронот, спортски игри и училишни претстави, се активностите со кои денеска учениците и наставиците год ООУ „Ристо Шуклев“ го одбележаа патрониот празник на училиштето.
Честа да се одбележи овој настан е дотолку поголема што се изведува после 78 години извојувана слобода од фашистичкиот окупатор, против кого се бореше и патронот, заедно со партизаните соборци од овој крај и од неговото родно место. Ристо Шуклев (1912-1944) учествуваше на сите акции на прогресивните младинци (Македонци, Срби и Црногорци) од Негорци и Горничет уште во текот на 1939-1940 година. Со излегувањето на првите партизани од Гевгелиско тој беше доставувач на храна, облека и друг материјал до партизаните сместени на Кожуф. Како напреден младинец тој се приклучува на антифашистичкото движење. Организатор е на илегални состаноци на членовите на НОБ. Во декември 1943 е откриен од тогашните окупаторски власти, затворен и ѕверски измачуван. Стрелан е на 4 јануари 1944 година, кај месноста Мала река. Имаше само 32 години.
Одбележувањето на патронот започна со положување свежо цвеќе на бистата на Ристо Шуклев во училишниот двор и на спомениците од НОВ во Негорци. Учениците благодарни на целото борбено и општествено посветено дело и живот на нивниот патрон почести им изразија и на паднатите борци од Негорци за време на НОБ на споменикот во центарот на Негорци, во близина на училиштето.
Во чест на Патронот, учениците одиграа спортски натпревари, драмската секција од училиштето изведе театарска претстава, настапи и училишниот хор за пубиката составена од ученици, наставници и гости на патрониот празник.
Слава и почит за патронот првоборец, посветена работа и успех на учениците и работниот тим на училиштето во годините на слобода, учење и вреднување.
Првата организирана настава на македонски јазик во Негорци датира од 1910 година со формирањето на првото македонско црковно-општинско училиште во кое настава изведувал македонски учител.
После војната во 1944/45 во негорци учителствувале првите народни учители. Од 1948г. основното образование од четиригодишно прераснува во седум-годишно образование со полагање мала матура.
Во учебната 1963/64г. училиштето прераснува во централно основно училиште со подрачни училишта во Серменин, Кованец и Прдејци, а во учебната 1965/66г. отворена е забавишна група за децата пред поаѓање на училиште.
По 50 години од воведувањето осумгодишно образование, во учебна 2007/08г. воведено е деветгодишно основно образование.
Честит патронен празник на сите ученици и вработени во ООУ “Ристо Шуклев” од Негорци, многу успеси во остварувањето на образовниот процес и совладувањето на наставните содржини во годините кои претстојат.