Со Одлука на Советот на општина Гевгелија за измени и дополнувања на одлуката за извршување на Буџетот за 2023 година, денеска се отвори можноста за исплата на поголема плата за 78% од досегашната, на градоначалникот на општина Гевгелија.
Општинската администрација објасни дека „Ваквата одлука е во констелација со Одлуката на Уставен суд на РСМ кој го укина член 4 од Законот за плати на именувани и избрани функционери во државата“. Со тоа на сила остана основица за плата на функционерите да биде просечна бруто плата исплатена во државата во минатата година.
Така од сегашната основица која изнесува 26.755, денари за градоначалникот ќе се пресметува бруто плата со нова основица од 47.637 денари, или 138.147 денари бруто плата месечно. Нето платата ќе изнесува околу 92.500 денари. Додатоците на плата со стаж и друго се додаваат плус на оваа сума. Оваа плата градоначалникот треба да ја добие ретроградно од месецот на стапување на сила на оваа одлука, 23 март оваа година, така изгласа денеска Советот на општина Гевгелија
Советникот од Левица во дискусијата по оваа точка која беше прва на денеска одржаната 27-ма седница на Советот кажа дека „оваа одлука на Уставен суд е расипништво и сите советници имаат должност да гласаат против оваа одлука“.
Советниччката Софија Раманчева од СДСМ праша:
– „Дали за обезбедување на околу 750.000 денари повеќе за исплата на зголемувањето на платата на градоначалникот се планирана Ребаланс на буџетот на општината за 2023 годиа и од каде би бие обезбедени овие додатни средства? Што од сегашниот Буџет на општина Гевгелија ќе биде скратено како плански расход за потребите на граѓаните на општина Гевгелија, а ќе се пренамени од граѓаните, за зголемената плата на градоначалникот?“
Советникот од ВМРО-НП Виктор Кралев праша:
– „Зошто и на советниците не им се покачува надоместокот за 78%? И ние сме избрани функционери!?“
Советникот од независната граѓанска листа Томе Ќичуков го праша градоначалникот Сарамандов: „Дали има намера да се откаже од тие средства по примерот на други градоначалници од неговата партија кои изјавија дека износот од покачувањето на платата ќе го донираат?“
Тој го побара присуството на пратеничките од Гевгелија кои добија ист процент покачување на своите плати. „На секоја седница се поканети, а на ниту една немаат присуствувано“, – констатира Ќичуков.
Сашо Стојиловски од ВМРО-ДПМНЕ истакна дека „Оваа Одлука е осудена од јавноста. Ние како Совет не можеме да ја смениме одлуката на Уставен суд, ниту Законот за плати. Власта треба да направи корекција и да ги врати платите на исто ниво“.
Тодор Ристов од СДСМ во својата дискусија истакна дека во државата оваа одлука опфаќа 1.056 именувани и избрани функционери. Тоа не се лица само од СДСМ. Има од повеќе партии. Овде се вклучени и градоначалниците на ВМРО-ДПМНЕ кои ги има по општините во државата.
Ребаланс нема да има потреба да се донасува за исплата на зголемената плата ако продолжи сегашното темпо на наплата на општинските основни комунални и даночни приходи, одговори Градоначалникот Сарамандов, со што ги потона очекувањата на независниот граѓански советник кој бараше да се изјасни дали има намера средствата да ги донира.
Советот на општина Гевгелија ја донесе Одлуката за зголемување на платата на градоначалникот за 78% повисока од сегашната со 10 гласови „ЗА“, 2 „Против“ и 1 „Воздржан“ глас.
Останаа 6 советници без да се изјаснат од присутните 19 колку што беа констатирани на почетокот на 27-та седница на Совет на општина Гевгелија.
Како беше онаа народната: „Сложни браќа ……… “
