Вчера изби пожар во маркетот на бензинската на „Окта“ лоцирана на влезот во Гевгелија. Екипа на ТППЕ од Гевгелија со две ПП возила и 5 пожарникари веднаш интервенираше на терен и пожарот бил целосно ликвидиран.
– „Беше опожарен просторот околу касата во маркетот. Тамошните вработени се обиделе сами да го изгаснат огнот поради што едно лице е полесно повредено“, известува за GevgelijaNet командирот на ТППЕ Гевгелија, Игор Ризов.
Од „Окта“ за настанот известуваат дека се случил вчера, 29 мај во 14 часот, кога од неутврдени причини, кои во моментот се истражуваат, дошло до опожарување во просториите на маркетот во состав на бензинска станица ОКТА која е во сопственост на нивни партнер, лоцирана во Гевгелија.
Со ефикасната интервенција на локалната противпожарна екипа, пожарот е веднаш изгаснат, со што е спречено негово проширување, додаваат од Окта.
– „Додека се чека официјалниот извештај од надлежните органи, увидот на лице место укажува на тоа дека безбедноста на бензинската станица, на вработените во објектот и на потрошувачите, не е нарушена од овој инцидент“, наведуваат тие.
