Заедно со ФРОНТЕКС во првите пет месеци годинава екипи на Граничната полиција на МВР спречиле над 3 илјади илегални преминувања на јужната граница.
Ова го констатира Министерот за внатрешни работи Оливер Спасовски при денешната посета на Регионалниот центар „Југ“, каде што оствари средба со раководството на оваа организациска единица на МВР, со цел брифирање за состојбите со мигранти на границата со Грција, на која веќе два месеца заеднички се распоредени македонските полициски службеници и 140 претставници на ФРОНТЕКС од 8 земји.
– „Благодарение на заедничките напори, во првите 5 месеци од 2023 спречени се 3.518 илегални преминувања на државните граници, најголем дел на границата со Грција – 3.048, односно бележиме намалување на обидите за 42%. Воедно, откриени се 29 случаи на криумчарење на 234 мигранти со мерки за кривичен прогон за 21 лице“, истакна министерот Спасовски.
Се намалува порознаста на Јужната граница на Македонија со Грција. Овде обидите за илегален премин се намалени за 42% за изминатите 5 месеци од годината и претставува успех на граничната полиција при ГП „Богородица“ и РЦ „Југ“.
Министерот Спасовски изрзи уверување дека вработените од Регионалниот центар „Југ“, како и нивните колеги од ОВР Кавадарци, СВР Велес и ОВР Гевгелија во наредниот период ќе продолжат со реализацијата на активности кои носат резултати, како во делот на репресивните мерки, така и со превентивните активности во заедницата, со цел одржување и зголемување на безбедноста на граѓаните.
