Во спомен на најдобриот голман на гевгелиски ФК „Кожуф“ Никола Гелебешев кој почина на 73 годишна возраст, после само една година од неговото заминување фановите и Навивачката група „Фантоми Север“ од Гевгелија организираат фудбалски Меморијал „Никола Гелебешев“.
Помладите генерации можеби само слушнале за него, но оние постарите добро се сеќаваат на неговите бравурозни одбрани. Тој во текот на долгогодишната кариера стоеше меѓу стативите на три клуба, „Кожув“ од Гевгелија, МИК (сегашно Скопје) и Работнички. Во сите тие остави силен печат и симпатизерите на секој од овие клубови со пиетет се сеќаваат на него. Гелебешев, во најтешките моменти, со своите одбрани често беше творец на победите, па можеби затоа и денеска, кога навираат сеќавањата на минатите убави фудбалски денови, често се споменува неговото име. Нема сомнение дека името на Гелебешев има посебно место во гевгелиската, скопската и македонската фудбалска историја. За него љубителите на фудбалот често знаеја да кажат дека тој е голман со ромaнтична душа.
Оваа душа сега ќе се споменува на Првиот фудбалски меморијал организиран во негова чест и спомен, на фудбалските терени во Гевгелија од 14-ти до 30-ти јули.
За фудбалската, голманска и тренерска легенда од југот знаат многумина, но на теренот годинава ќе заиграат младинци и пионери, генерации родени од 2005 до 2008 година, и млади пионери родени 2009/2010, 2011/2012 и 2013/2014 година. Наградниот фонд е 60.000 денари, а ќе се доделат пехари и медали за секој играч од трите најдобро пласирани тимови.
Пријавувањето трае до 12-ти јули, на телефонскиот број 077-709633 или на официјалниот профил на организаторот – Фантоми Север.
Виртуозот во лов на „фудбалските буба мари“ јавноста вечно ќе го памети по настапите во ФК Кожуф, исто така и по настапите во Југославенската лига за ФК „Работнички“ и ФК „Вардар“. Богданчани го паметет по настапите во ФК „Вардарски“. По завршувањето на играчката кариера несебично се залагаше знаењето и искуството да го пренесе на младите генерации како тренер. Ретки се луѓето како него кои живееја за здрава и успешна младина.
НИКОГАШ ЗАБОРАВЕН!
Никола Гелебешев – (Гевгелија 1949 – Гевгелија 17 мај 2022)
