Гевгелиската правничка, адвоктка, поранешен јавен обвинител во ОЈО Гевгелија Кети Петкова неделава даде свечена изјава како нов член на Советот на јавни обвинители
Чинот на полагање свечена изјава се изведе во Македонското Собрание, неделава (на 26 јули), пред спикерот Талат Џафери и генералната секретарка Цветанка Иванова. Кети Петкова од Гевгелија беше придружувана од претседателот на Советот, Антонио Јолевски.
Петкова го помина собранискиот филтер и покрај противењата на пратениците на ВМРО-ДПМНЕ кои прашуваа како таа, како член на Советот ќе ја оценува работата на јавните обвинители, кога во 2009 година токму од Советот била разрешена од функцијата јавен обвинител поради нестручно и несовесно работење во службата.
Петкова до 2009 работела како јавен обвинител во Гевгелија, а потоа продолжила да работи како адвокатка. Претходно, во изјава за „360 степени“, таа рече дека мандатот не ѝ бил продолжен оти тогашната власт имала законска опција да го направи тоа, а не дека работела нестручно и несовесно.
– „Јас од 1993 до 2003 работев во Основниот суд во Гевгелија, потоа од 2003 до 2009 како јавен обвинител, но тогаш се даде можност и да не се продолжи мандатот на обвинителите, што и се случи. Еден од колегите од нашата група кој исто како и на мене не му го продолжија мандатот тогаш, тужеше во Стразбур и се спогоди со државата. Неговиот епилог беше мотив да аплицирам и за член на Советот на јавни обвинители, инаку досега работев како адвокатка“, – кажа Петкова за „360 степени“.
Собраниската комисија за прашања на изборите и именувањата на 3 јули годинава ја утврди Кети Петкова како предлог за член на Советот на јавни обвинители. За неа седум гласа „за“ даде владејачкото мнозинство, додека единствената пратеничка од ВМРО-ДПМНЕ, Ели Панова, ја напушти седницата, па немаше ниту еден против, ниту воздржан.
По утврдувањето на кандидатот Кети Петкова за член на Советот на јавни обвинители од страна на Собраниската комисија за избори и именувања, следен чекор беше потврдата на пленарна седница на Собранието каде Петкова доби мнозинство гласови. Во средста таа даде свечена изјава во Собранието на Македонија. Со тоа гевгелиската правничка, адвокатка и поранешна јавна обвинителка официјално стана нов член во 11 члениот состав на Совет на јавни обвинители на Македонија.
