По седумчасовна борба со огнот екипа на ТППЕ Гевгелија потпомогната со доброволци од ДППД од Дојран и ТППЕ Валандово успеја да го изгаснат пожарот што го зафати Домот на културата во Фурка.
Пожарот е пријавен во 17:15 часот на 30 септември во саботата, а интервентните екипи на ТППЕ Гевгелија успеале да го изгаснат пожарот и да се вратат од терен дури пред полноќ, во 23:50 часот. Дел од тимот останал да ја надгледува областа да не дојде до повторна активација на огнот.
На терен се интервенирало со две Противпожарни возила и 5 пожарникари од ТППЕ Гевгелија, две ПП возила и тројца пожарникари од ТППЕ Валандово и 4-ца доброволци од ДППД од Дојран.
Во периодот додека огнот доминирал успеал да ја зафати и целосно опожари кровната конструкција на Домот која во потполност изгорела.
– „Противпожарните сили успеаја да ги заштитат од опожарување околните објекти, куќи во близина на Домот.
Инаку, објектот беше на места руиниран и срушен, па достапноста на надворешни лица во внатрешноста не е исклучена. Пожарот започна од внатрешноста, дали од цигара, или од немарност за сега не е констатирано. Во текот на денот на терен се упатија и инспектори и вештаци кои треба да ја утврдат причината и штетата од опожарувањето“ – изјави за GevgelijaNet командир на ТППЕ Гевгелија Игор Ризов.
Пожарот во Фурка, во објектот на Домот на културата се случи на 30 септември и ја заокружи бројката на 23 интервенции на ТППЕ Гевгелија во текот на месец септември. Од тоа 18 се на отворен простор, 2 на објекти, 1 на останато, 1 техничка интервенција и 1 сообраќајни средства.
Значи и понатаму доминираат пожарите на отворено. Сепак за разлика од август бројот на пожарите е намален и интензитетот во септември е 2 пожара во три дена, а интензитетот во август беше по еден пожар секој ден.
За ваквата посветеност во работата од Собранието на РСМ доаѓа добра вест дека:
– „СИТЕ пожарникари ќе добијат септемвриски плати зголемени за 10% и К15 чие реализирање се овозможува со средства од Државниот Буџет врз основа на усвоениот комисиски амандман со кој од државниот Буџет ќе се префрлат 60.000.000 денари кон ЕЛС како наменски дотации за општините“.
Овде спаѓа и ТППЕ Гевгелија со 22-та вработени пожарникари, а средствата ќе бидат упатени кон единицата на локалната самоуправа, Општината за прераспределба на наменските средства до крајните корисници, пожарникарите.
