Синоќа, на 16.10.2023 околу 20:40 часот на локалниот пат с.Стојаково-Богданци, полициски службеници од Полициската станица Гевгелија го лишиле од слобода А.Д.(41) од Скопје.
При преглед во товарно возило „Сканиа“ со светиниколски регистарски ознаки со полуприколка, кое го управувал, биле пронајдени 63 лица мигранти, од кои 55 мажи, шест жени и две малолетни лица.
По насоки од јавен обвинител, А.Д. бил задржан во полициска станица, а мигрантите биле сместени во прифатно – транзитен центар „Винојуг“ во Гевгелија.
По целосно документирање на случајот, против него ќе биде поднесена соодветна пријава.
Според Кривичниот закон на РСМ на сторителот кој нелегално превезувал мигранти му се запретува казна затвор од 1 до 5 години, а за делото кое е сторено спрема малолетно лице казната затвор пропишана со Закон е до 8 години.
Според КЗ, член 418-б „предметите и превозните средства употребени за извршување на делото се одземаат“.
Гевгелија и јужната граница на Македонија се дел од Балканската рута која ја користат криумчарите и мигрантите за транзит до земјите од Европската Унија.
Годинава обидите за нелегален транзит според податоците на МВР се намалени за 50%, барем според спречените акции кои Полициските сили на МВР ги реализирале во периодот јануари-септември.
– „Досега има околу 68 случаи на криумчарење на мигранти коишто се откриени, на над 700 мигранти кои што требало да бидат прокриумчарени, што е една висока стапка на ефикасност во откривањето на криумчарите на мигранти“ – велат од МВР.
