Одредот на Кралските извидници во Гевгелија организираа тридневен Извиднички Базар каде подготвија Новогодишни и хуманитарни пакети наменети за децата од социјално ранливи семејства од трите јужни општини (Гевгелија, Богданци и Дојран).
Беа подготвени пригодни празнични украси, сортирани намирници храна, вкусни изненадувања за Новогодишната ноќ на најмалите.
Освен тоа на локација пред Народниот театар во Гевгелија имаше многу активности за деца, работилници, игри, храна, разни десерти, се печеа кјасје пченка на оган, се спуштаа децата со јаже и други активности.
Сите собрани средства ќе бидат употребени за хумантиарни цели, изјавија од кралските извидници за тоа каде ќе се употребат средствата од продажбата на нивните изработки.
Во соработка со повеќе партнерски организации и извидници од Германија и Холандија, Кралските извидници од Македонија и Гевгелија израдуваа околу 100 деца од социо ранливи семејства.
– „Оваа година, поделивме 300 пакетчиња за деца и 100 пакети со храна на социјално ранливи категории во околината на Гевгелија, Богданци и Дојран. Бог се грижи за нас, а ние сакаме да ја покажеме Неговата љубов кон другите преку овој проект и да споделиме љубов и топли насмевки за овие празнични денови. Христос се роди! Среќни празници! За многу години!“ – изјавија од Кралските извидници на Македонија.
Дел од членовите на Гевгелискиот одред поделија пригодни пакетчиња и на штитениците во Дневниот центар на лица со посебни потреби во Гевгелија.
Партнерски организации на овој настан се Црвен крст Гевгелија и ЗПСК Кожуф кои се приклучија и ја збогатија програмата на Извидничкиот Базар на Кралските извидници во Гевгелија.
