Од денеска попладне градежна механизација започна изведбени работи за поставување канализациона мрежа во строгото централно градско подрачје.
Се работи на потегот од улицата „7ми Ноември“ од маркетот „Кит -Го“ до новоизградената зграда карши „Водостопанство“.
Нарачател на работите е општина Гевгелија, а финансиската конструкција ја затвори Министерството за животна средина на Македонија со наменски средства од 664.000 евра за проектни зафати во општина Гевгелија.
Средствата се одобрени од Буџетот на РСМ во јули 2023 година преку Министерството за животна средина и просторно планирање, но зошто Општината Гевгелија гради токму сега си знаат тие самите. Финансискиот влог на МЖСПП во Гевгелија е со намена за водоводни системи, пречистителни станици, реконструкција на стари и поставување на нови канализациони системи. Овој потег од „Ки-Го“ до новите две станбени згради карши стариот градскки пазар ја има токму последната намена „изградба на нови канализациони системи“.
Денеска со почетокот на градежните работи на терен, недостасуваше информирање од локалната самоуправа како нарачател на работите и од гевгелиски „Комуналец“ како стопанисувач со канализациониот систем во градот, за тоа што се работи и за ограничениот сообраќаен проток низ улицата „7-ми Ноември“.
Вечерва улицата е сообраќајно регулирана со флуоросцентни граничници на работниот терен.
Најавените работи налагаат повеќедневни работни изведби, па учесниците во сообраќајот треба да внимаваат на овој потег од градот.
