При денешната посета на Прифатниот центар „Винојуг“ кај Гевгелија Заменикот министер за внатрешни работи посочи дека е „Намалена илегална миграција за 50%, во 2023 во споредба со 2022 година, што се должи на ефикасноста на раководството на РЦ „ЈУГ“, државните институции, меѓународните организации и сите чинители вклучени во овој процес
Денеска, (11.03.2024) дополнителниот заменик министер за внатрешни работи Митко Бојмацалиев во Прифатниот центар Винојуг во Гевгелија присуствуваше на Координативниот состанок во организација на раководството на Регионалниот центар „Југ“ со претставници од сите релевантни државни институции, меѓународни организации и невладини организации-присутни чинители во Привремениот транзитен центар како дел од националната компонента во справувањето со мешаните миграциски движења.
Целта на состанокот беше последниот позитивен извештај на Народниот Правобранител како резултат на меѓусебното координирано и хармонизирано постапување на овие институции со илегалните мигранти во кампот Винојуг Гевгелија.
Во своето обраќање по тој повод дополнителниот заменик министер за внатрешни работи Митко Бојмацалиев истакна:
– „Според официјалната статистика на МВР, ако во 2023 година беа спречени 13.954 обиди за влез на илегални мигранти на ниво на сите Регионални центри, само на ниво на Регионалниот центар „Југ“ таа бројка изнесуваше 12.265 спречени обиди за влез на илегални мигрант. За период од два месеци во 2024 година на ниво на МВР таа бројка изнесува 1596 спречени обиди за влез, само на РЦ „Југ“ беа спречени 1057 обиди за влез на илегални мигранти. Компаративно на ова во 2022 година на ниво на МВР беа спречени 27.394 илегални обиди за влез , а само на ниво на РЦ Југ таа бројка изнесуваше 23.451.
Овие бројки покажуваат намалување на илегалната миграција за 50% за што најголема заслуга имаат полициските службеници и раководството на РЦ „Југ“- истакна Бојмацалиев по што упати честитки за постигнатите резултати.
Ова значи дека 88% од спречените обиди за иегална миграција се реализирани на јужната граница на Македонија со интервенција на полициските сили на РЦ „Југ“ и соработката со европските партнери од „Фронтекс“.
Тој информираше и за баратели на азил во 2024: „Во делот на баратели на азил во 2023 година на ниво на МВР таа бројка изнесуваше 604 лица, а во Прифатниот центар Винојуг имавме 202 лица. Во истиот период првите два месеци од 2024 година на ниво на МВР изнесува 36 лица а во Прифатниот центар Винојуг имаме 24 лица”, рече Бојмацалиев.
На средбата присуствуваше и заменик министерката за труд и социјала, директорката на центарот за социјални работи Гевгелија, директорот на Центарот за управување со кризи, раководителот на РЦ „Југ“.
Во периодот што следи со исклучителна посветеност ќе се работи кон операционализирање на Мастер планот изработен од Фронтекс, како еден од нашите стратешки приоритети кон доближување кон европските и меѓународните стандарди во оваа област, велат од МВР.
