Градоначалникот на Струмица ги предаде клучевите на карневалистите. Од синоќа на власт во Струмица се карневалистите кои ќе „владеат“ се до денот Тримери, ќе нема политика, ќе нема политички дуели, само забава, карневалски дефилеа, маски, многу насмеани лица … се’ додека трае Струмичкиот карневал.
Иако е предизборен период, Александар Цицимов, претседател на Карневалскиот одбор, земајќи му го клучот од градот на градоначалникот Костадин Костадинов, заедно со Карневалскиот одбор на Струмичкиот карневал воведуваат нови правила на однесување, почитувајќи ја вековната традиција на струмичани.
Правилата се: -„ Возрасните и децата ќе се маскираат, младите музичари и под маска ќе свират и пеат, ќе има принц и принцеза како во бајките, ќе доаѓаат и маскирани лица од балкански и европски земји. Струмичани еден на друг ќе си простуваат за грешките од изминатата година, ќе се јаде бел фасуљ, ќе се оди кај армасани девојки, таму ќе се пеат еротски песни, а на сам ден Тримери ќе се јадат само посни јадења залиени со боза“ – велат организаторите.
Вака вели традицијата.
На маскембалот учество ќе земат и гостински тимови на карневалисти кои доаѓаат од далечната Финска до Грција, од Турција до Италија.
Градоначалникот Костадинов предавајќи го времено својот градоначалнички мандат во рацете на карневалистите, посака да му ја чуват Струмица, да создадат повеќе креативни маски и повика да се радуваат и да ја слават оваа голема традиција, која датира дури од 17 век.
Главната интернационална карневалска вечер од годинашното издание на Струмичкиот карневал е во сабота на 16 март, кога 48 карневалски маски со 1.346 маскирани лица ќе продефилираат низ булеварот „Маршал Тито“ и плоштадот „Гоце Делчев“ во Струмица.
Фото: Радио СтрумицаНет
