Ракометните ветеранки на „МЛАЗ“ Богданци и ЖРК „Ветеранки Југ“ од Гевгелија викендов зедоа учество на третиот по ред Меморијален турнир во ракомет за жени „Јасмина Голубовиќ“ што се одржа во Куманово во спортската сала „Перо Наков“ во Средното економското училиште.
Некогашниот состав на „МЛАЗ“ Богданци освои Второ место, а ветеранките од Гевгелија освоија трето место.
Носителки на првиот трофеј се ветеранките од домаќинскиот тим на Куманово.
Меморијалот претставува спортско сеќавање во чест на ракометарката Јасмина Голубовиќ, која беше активна во 60-тите години, носејќи му успеси на матичниот клуб ЖРК „Куманово“. Нејзината умешност како белег на женскиот ракомет во Куманово, остави значајни резултати. Ова е трет меморијал од востановувањето во 2022 година.
– „Спортско куманово уште еднаш на достоен начин се оддолжи на својата ракометна икона која и понатаму живее во срцата на многу спортски љубители и навивачи. Ракометните ветеранки останаа доследни чувари на традицијата, на сеќавањата за спортистите кои согоруваат на теренот, за секоја победа, за секој гол. Таква беше и Јасмина која ги мотивираше девојките во тимот, која им делеше совети пред игра, која им помагаше да бидат поуспешни на терен за да изборат заеднички успех. Публиката повторно аплаудираше на ветеранките и се сеќаваше на Јасмина. Традицијата продолжува!“ – напишаа верните фанови на кумановската ракометарка.
Јасмина Голубовиќ прерано почина на 42 годишна возраст, родена 1947, замина од овој свет 1989 година.
Нејзината публика повторно беше на трибините. Ветеранките повторно заиграа во мислите со неа.
Спортското мото на меморијалот е од животното кредо на Јасмина: „Годините не се пречка. Победи ако можеш, изгуби ако мораш, но не се откажувај никогаш!“
Вечен спомен за Јасмина!
Честитки за енергичните ракометарки од југот.
