Традиционалните вредности на Гевгелија преточени во песна, игра и кулинарски специјалитети беше изборот со кој се претставија гевгеличани пред телевизиската публика на „Алфа“.
Ансамблот „Распеани гевгеличани“ со петдецениското постоење и негување на народната традиционална песна од Гевгелија и гевгелиско е нешто неизбежно кога се претставува градот на југот.
Тие се претставија со сплет песни од гевгелиско.
Народните ора, моминското везено чекор по чекор, расните момчешки игри беа резервирани за Ансамблот „Бојмија“ кој зад себе има завидна 20 годишна активност на сцените во Македонија и низ светот со презентација на македонската култура и традиционалните македонски ора.
Ресторанот „Јавор“ и вкусното јагнешко не може да се заобиколи кога се зборува за угостителството и гостопримството на посетителите на Гевгелија. Тоа го вкуси и водителката на „Везилка“ Адријана Алачки.
Домашните рецепти на сукано, печено, под вршник, во камена фурна, со кајмак, со овчјо кисело млеко, полеано со планинска вода и сервирано на планински воздух е богатството со кое се претстави новата угостителска дестинација во гевгелиско „Серменински чардак“. Домаќините не штеделе во изненадувањата за свечената трпеза на „Везилка“ за време на гостувањето во емисијата.
Овде се и специјалитетите на „Де факто“, за оние кои сакаат добар вкус, сервирано со поглед на реката Вардар.
И кога гостите ќе сакат нешто да понесат како спомен за сеќавање од гевгелија, освен добриот вкус на домашните јадења приготвени од мајсторите на угостителската препознатливо вкусна понуда во гевгелиските ресторани, тука се креациите на уметницата Гордана Петрова која изработува теракоти од гевгелиски знаменитости: артефакти од Вардарски рид, препознатливата архитектура на градската библиотека во Гевгелија, познатите јужни плодови од поднебјето – смоква, калинка и слично.
Гевгелија се сака со песна, со игра, со угостени дојденици, со подарок за сеќавање на убавиот југ, на топла, распеана и гостопримлива Гевгелија.
- „Везилка е најгледаниот во моментов, а слободно можам да кажам и најубавиот проект на Алфа телевизија. Алфа телевизија е посветена на промоцијата и негувањето на македонската култура и традиција и со овој проект ние го правиме токму тоа“, велат од уредничкиот тим на емисијата.
А, гевгеличани благодарни што тие по четврти пат, како препознаена вредност на македонската култура и традиција гостуваат во оваа музичко-забавно шоу.
