Гевгелиската публика синоќа беше сведок на една музичка културно-оперска историја која се изнедрила во почетоците на XX век, во 1924 година со поставката на првата опера во која учествувале деца од Гевгелија.
Овој настан беше спојување на минатото со сегашноста и едукација на сегашните генерации дека музичката историја на Гевгелија не се само блех музичарите, градските свирачи, групи и фолклорни ансамбли, туку дека југот е зародишот на оперскиот музички живот во Македонија со поставувањето на првата детска опера „Принцезата Ружа“.
Музичкото дело било авторство на рускиот имигрант Сергеј Михајлов кој живеел и работел тој период во гимназијата во Гевгелија каде предавал музичко образование, а поради недостаток на кадар и математика. Своето дело го поставил на сцената во Гевгелија во изведба на деца оперисти, ученици од гевгелиската гимназија. Оперскиот состав го сочинувале 8-мина ученици, а научно-историското истражување го откри главниот лик на операта „Принцезата Ружа“, 13 годишната Драга Ѓоргевиќ.

Дара била со извонредни гласовни можности, открива за неа внуката истоименичка Драгица Карајанова (Даскала) која се сеќава во детството дека често, многу често баба и’ Дара и раскажувала како била принцеза и ги покажувала фотографиите од претставата „Принцезата Ружа“ и понесена од сеќавањата ја пеела својата оперска улога пред единствената публика, својата внука. Малата тогаш Драгица вели дека ги држела во рацете рачно испишаниот нотен запис од операта на Сергеј Михајлов несвесна дека во рацете држела македонска музичка историја за зачетокот на оперскиот живот во Македонија пред 102 години.

Изложба „Спомени од сцената“ која беше отворена во салонот на х.Аполонија во Гевгелија, сведочи за зачетокот на оперскиот живот во Македонија, за културниот момент кој го испишала Гевгелија во музичката историја на Македонија, за посветеноста на семејните сеќавања во откривањето на таков значаен културно-историски момент за државата и улогата на образовниот живот во Гевгелија за создавање на нови музички вредности.

На изложбата се презентираше културната музичко-оперска историја на Македонија и Гевгелија, стара 102 години.
На настанот зборуваа:
– Наташа Диденко, проф. Д- р истраживач и научник;
– Драгица Карајанова (Даскала), внука на првата оперска изведувачка, 13 годишната Драга Ѓорѓевиќ од Гевгелија;
– Билјана Ристовска Јосифовска, промотор на изложбата.
Настанот беше во организација на ЈОУ библиотека “Гоце Делчев”, фамилијата Карајанови, а поддржан како проект од Општина Гевгелија.
Драга Ѓоргевиќ не станала оперска певица. На првото гостување со детската опера „Принцезата Ружа“ во нејзина главна улога, во Струмица и во Штип ги добила комплиментите од публиката и музичките познавачи. Но еден бил судбински: „Имаш прекрасен глас Драга. Штата што си се родила во мал град“. Тогаш Гевгелија броела 5.000 жители, а со гостувањето во Штип нивниот професор Сергеј Михајлов бил задржан без да му дозволат да се врати со учениците од оперскиот состав во Гевгелија, бидејќи во него откриле извонреден талент, па зошто да го троши во малата Гевгелија, а не во некој поголем град. Следната година тој ја поставува операта „Паљачи“ на сцената во Скопје. Но, историски факт е дека Гевгелија е никулецот на оперскиот живот во Македонија, со поставувањето на првата детска опера „Принцезата Ружа“ во 1924 година од минатиот век.
И, ве интересира ли што станало понатаму со оперетката „принцезата Ружа“, ученичката Драга? Таа завршува гимназија во Гевгелија, се венчава со саканиот од семејството Карајанови, работи од 1927 до 1934 година во мануфактурната работилница на својот брат Костадин Ѓоргевиќ, а во од 1934 до 1947 година работи во свој сопствен дуќан како жена-претприемач, самостоен стопанственик.

Така, еден детски талент од музиката станал стопанственик, сопруга, мајка и баба, која ги распослала своите музички гени во поширокиот круг на своето потомство фамилија Карајанови, Шарланџиеви, Каленикови …
- „Драга е дел од Гевгелија, Гевгелија е дел од нас, а приказната продолжува…!“ – со овие збориви авторката на ова музичко-историско истражување и историска прошетка по минатото Наташа Диденко ја заврши презентацијата на изложбата најавувајќи создавање на монографија за овој културно-историски момент на Гевгелија и устоличувањето на топлиот југ за никулец на оперскиот живот во Македонија.
- „Град што ги негува приказните за своите луѓе, ја чува и својата културна историја“ – рече промоторката на изложбата проф.д-р Билјана Ристовска Јосифовска оддавајќи признание на Гевгелија за целата соработка во откривањеро на овој културно-историски момент за Гевгелија како центар на појавата на оперскиот живот во Македонија.




















