42-та седница на Советот на општина Гевгелија се одржа во отсуство на советникот од Левица, Сашко Јанчев, кој со добивањето пратенички мандат од последните Парламентарни избори во Македонија и добивањето Решение за избран пратеник од ДИК е неспоиво да ја обавува и функцијата член на Совет на општина Гевгелија.
Јанчев ја известил Општинската изборна комисија и Општина Гевгелија дека на 28 мај му е верификуван мандатот како пратеник од Гевгелија на првата Конститутивна седница на Собранието на РМ и со тоа му престанува мандатот во Советот на општината.
Неговото место според Изборниот законик на РСМ треба да го пополни следниот на Листата за советници од редовите на партијата „Левица“, со која оваа партија учествуваше на Локалните избори во 2021 година.
Тоа е Николчо Петров од Негорци, втор на листата кандидати за советници од гевгелиска „Левица“ за локалниот совет на ЛИ 2021.
Од ОИК велат дека го известиле кандидатот Петров дека е следен на листата за советници со можност да го завзеде местото од еден советник што го освои Левица на последните локални избори. Кандидатот Петров се изјаснил дека го прифаќа местото во советничките клупи.
-„Утре или задутре на кандидатот Николчо Петров ОИК ќе му издаде уверение за избран член во Советот на општина Гевгелија, а Советот на следната седница треба да му го верификува мандатот“ – изјави претседатлот на ОИК за Гевгелија, Митко Ризов.
Мандатот на Петров ќе трае до мандатот на овој Состав на општинскиот совет, до распишувањето на следните локални избори во Македонија, 2025 година.
