Во саботата, 8 јуни, вработените во ТППЕ Гевгелија имаа полни раце работа – во текот на денот имаше пријави за три пожари на отворен простор и на сите три благовремено интервенираа противпожарните тимови од ТППЕ Гевгелија, со што пожарите се ликвидирани.
Два пати гореше во атарот на Мрзенци, третиот пожар беше на депонијата кај Конско.
Претпладнето во саботата, беше извршена интервенција во поле, во атарот на село Мрзенци. Пожарот беше ликвидиран. Причината за опожарувањето не е позната.
Втората пријава за пожар во саботата пристигна во дирекцијата на ТППЕ Гевгелија во 14:30 кога беше пријавено дека гори ниско стеблеста шума на подрачјет на Мрзенски рид. Оваа локација ангажираше повеќе противпожарни сили. На терен беа три ПП возила со осум пожарникари од ТППЕ и 6-мина вработени од Шумско стопанство „Кожуф“ Гевгелија. Пожарот најпрво беше ликализиран. Во акцијата учествуваше и багер на Винаријата „Риго“ од Гевгелија, бидејќи огнените јазици се движеа од север кон југ, во правец на индустриската зона во Гевгелија лоцирана во подножјето на Мрзенски рид. Пожарот беше целосно ликвидиран во 17:30 часот. Екипи на ШС „Кожуф“ дежуреа во текот на ноќта за да не се потпалат од ветрот веќе угаснатите згаришта.
Третата интервенција на ТППЕ Гевгелија беше гаснењето на настанатиот пожар на новата депонија во атарот на с.Конско, во пазувите на Кожуф планина. Се интервенираше со 1 ПП возило, еден багер на ЈПКД „Комуналец“ кој го посипуваше запалениот комунален отпад со земја. И овој пожар беше целосно ликвидиран.
Пожарите земаат замав, во државата, а од саботниот извештај тоа е присутно и во Гевгелија. Потребно е внимание од граѓаните за време на престој во природа, да не фрлат отпушоци од цигари, да не потпалуваат стрништа, да не работат со апарати кои испуштаат искри во близина на сува вегетација. Воопшто потребен е одговорен однос на сите заради заштита од пожари.
Проблемот со пожарите дополнително го отежнува податокот дека авионите на ДЗС се вон функција. Два се испратени на сервис и се’ уште не се вратени. Директорот на ЦУК вели засега успешно менаџираат со хеликоптерите на полицијата, но смета дека високите температури ќе предизвикаат проблеми со кои потешко ќе се справуваат.
Во прашање е доведено авио одделението на ДЗС бидејќи двајца пилоти заминаа во пензија. Во дирекцијата има само уште еден пилот обучен за ер-тракторите. Се бара одобрение од министерството за финасии за да можат повторно да ги ангажираат пензионираните пилоти.
Во сезона на пожари, во пракса пилотите на ДЗС имаат и до 150 прелети.
