Гевгелија, Богданци, Валандово и Дојран денеска и утре ќе бидат во портокалова фаза поради високите температури, потсетуваат од Центарот за управување со кризи (ЦУК) и апелираат до граѓаните да ги почитуваат препораките што вчера ги донесе техничката влада.
– „За градовите што ќе бидат зафатени од портокалова фаза се препорачува ослободување од работните обврски на најранливите групи население, односно бремените жени и лицата на возраст над 60 години. Во градинките е препорачано да не се практикува физичка активност и да не се изнесуваат децата на отворено во периодот од 11 до 17 часот“, се наведува во соопштението на ЦУК, во кое потсетуваат на препораките од Владата.
Денеска и утре во најтоплите централни и југоисточни предели дневните температури локално ќе достигнат дури до 40, 41 степен. UV = 9, што претставува висок коефициент и значи „сонцето ќе пржи“. Овие два дена воедно ќе бидат и најтоплите досега во годината.
Овие два дена, како што соопштија вчера од Владата, најавено е и дека од високи температури, но од жолта (алертна) фаза ќе бидат зафатени Скопскиот и Вардарскиот Регион, во кои ќе важат општите препораки што ќе ги соопшти Министерството за здравство.
Поради југозападното струење на висина кое е доста изразено овие денови, во Македонија и во следниот период ќе биде присутно значително количество на Сахарска прашина и песок, па така и атмосферата ќе биде многу заматена, а времето ќе биде многу мачно и спарно, па така и температурите ќе се чувствуваат како да се многу повисоки од реално измерените.
Единиците на локалната самоуправа, Црвениот крст и центрите за социјални работи во регионите зафатени со топлотниот бран е предвидено да им помагаат на осамени, стари, изнемоштени, како и на бездомни лица.
Со оглед на фактот дека одредени ризични производни и технолошки процеси може да претставуваат дополнителен ризик по здравјето на изложените работници, Владата ги потсетува работодавачите на обврската за почитување на законските прописи од оваа област.
