Со најмногу гласови од публиката собрани преку СМС -пораки, вкупно 6.087 на број, македонскиот натпреварувач Сашо Башески од Прилеп вчеравечер победи во регионалното музичко шоу „Никогаш не е доцна“.
Во Големото финале, кое се одржа во Белград, Србија, Сашо доби дури рекордни 6.078 СМС-гласови. Тоа значи дека најмногу за него гласаше публиката од Вардар до Триглав.
Наградата му ја врачи пејачката Калиопи, која му честиташе за маестралните настапи на натпреварот.
– „Прилеп ќе се гордее, како и сите Македонци. Ти благодарам“ – му порача Калиопи, а победникот не ја криеше среќата и благодарноста.
Уште како момче, прилепчанецот Сашо Башески (54) рекол дека еден ден ќе биде пејач, а таа желба му се исполнила пред триесетина години кога го фатил микрофонот и почнал да настапува со својот брат Дејан како бенд „Дуо Башески“.
Никогаш не зачекорил професионално во музичките води бидејќи, како што вели, го привлекува музиката, а не естрадата.
Ова шоу ужива голема популарност кај нас во Македонија, па Големото финале имаше чест да го отвори добро познатата и секогаш распеаната, 95-годишната дојранчанка Добрила Чабриќ-Ивановска. Таа настапи како ексклузивна гостинка, на поканата на Жика Јакшиќ, кој многу ја почитува и ја сака. Добрила во шоуто убедливо победи пред некоја година.
Победник од стручното жири во „Никад није касно“ е некогаш многу познатата пејачка од Нови Сад, Ружица Чавиќ-Томиќевиќ.
Победничка статуетка доби и убавата Селма Чавкиќ (43 години) од Бихаќ, која освои најмногу фејсбук гласови.
Инаку, Сашо на почетокот на учеството во шоуто откри дека со музика се занимава повеќе од три децении, а своевремено свирел и бас гитара.
Со неговиот брат Дејан, тие се познати како „Дуо Башески“.
Тој откри дека никогаш не се оженил и живее со мајка му Павлина, а на натпреварот се пријавил благодарение на внуките и најблиските кои го поттикнувале.
По победата, тој рече дека никогаш не е доцна да се ожени.
„Никогаш не е доцна да се оженам. Се јавуваат дами, веќе почнувам да размислувам за тоа. Оваа емисија ми отвори нови познанства, пријателства и нови можности“ – вели Сашо.
Со победата на Сашо, Македонија како земја на песна и музика повторно покажа со сета својата раскош дека е навистина песнопејна нација, со распеани грла што достојна ја претставуваат и победуваат.
