Младата Божица Јакимова е ученичка од IV година гимназија при СОУ „Богданци“ од Богданци и од саботата таа е Државен ПРВАК по Филозофија на одржаниот натпревар во Скопје.
Предметот Филозофија го изучува како дел од наставната програма, а под менторство на професорот Ристо Живковиќ, таа успешно се подготви за државниот натпревар што се одржа на 11 март во просториите на Филозофскиот факултет во Скопје. Овде освои Прво место, со што се пласираше за учество на Меѓународната Олимпијада по филозофија што ќе се одржи во Грција.
Божица своето учество на државниот натпревар го обезбеди со успешен резултат на одржаниот Регионален натпревар каде во конкуренција на 70 ученика, 25-те најдобро рангирани се пласираа на државен натпревар. Тогаш немало пласирани места па Божица не знаела дали е прва, втора, или 25-та. Затоа сериозно се подготвила за државниот натпревар и овде сите ги претекнала со своето филозофско знаење.
Скромно за својот успех и покажано знаење по филозофија Божица за GevgelijaNET.com изјави:
– „Содржината на тестот од натпреварот во Скопје се состоеше од прашања и составување на филозофски есеј од околу 300 збора“ – вели победничката од Богданци заборавајќи да ни’ ја открие победничката тема од својот есеј.
На државниот натпревар учествуваа 25 ученици од 11 средни училишта. Најмногу натпреварувачи имало од средното училиште „Славчо Стојменски“ – Штип и „Д-р Ибрахим Темо“ – Струга и од други училишта. Божица од сите нив била најдобра.
Божица покрај филозофијата ја сака и математиката, и двата предмета и’ се омилени. За своите понатамошни амбиции после матурирањето ни’ изјави:
– „Се’ уште немам одредено каде точно би го продолжила моето високо образование. Натпреварот беше едно мое убаво искуство, а резултатот мотивација за поголем труд и успеси во иднина.“
Честитки за најдобриот филозоф среднист во Македонија – богданчанката Божица.
И’ посакуваме успех во понатамошниот образовен подем.
Честитки и за нејзиниот ментор за успешно пренесената древна наука и на новите генерации средношколци.
