Штитениците на Дневниот центар во Гевгелија и Центарот „Мајка Тереза“ кои се специјализирани за згрижување на лица со посебни потреби, деновиве имаа пријатна посета од страна на оснивачот и претставници на Фондацијата „Ице Бегов“ од Скопје.
Пријатноста беше во дружењето, поминатото време заедно, заедничкиот ручек во Негорските бањи, Гевгелија. Претставниците на фондацијата имаа и хумана мисија при своите посети на дневните центри во Гевгелија, донираа опрема.
На Дневниот центар при ЦСР Гевгелија донирани се столови за трпезаријата, нов бојлер и принтер. Во Центарот „Мајка Тереза“ на Македонски Каритас во Гевгелија донирана е „CNC машина“, за потребите на Центар Мајка Тереза Гевгелија, која ќе служи за изработка на сувенири.
Штитениците на двата центра за згрижување на лицата со посебни потреби во Гевгелија денот на посетата на претставниците на Фондацијата „Ице Бегов“ го заокружија со заеднички ручек. Истиот беше во чест на роденденот на именосецот на фондацијата, младиот Ице Бегов, роден гевгеличанец кој почина за време на пандемијата како последица од корона.
На 29 јули кога се одржа средбата на фондацијата со штитениците и заедничкото славење, Ице ќе наполнеше 29 години. Сега, кога го нема, наместо дарови за него Фондацијата додели подароци за овие лица од дневните центри во Гевгелија.
Убав гест, убави спомени. Ице живее со делата на фондацијата и преку благодарноста на лицата со посебни потреби.
Именосецот на фондацијата е роден гевгеличанец, лице со посебни потреби кое почина од компликации од вирусот корона за време на пандемијата. Родителите и семејството во негов спомен и ангажман за лицата со посебни потреби формираа фондација која не и’ е прв пат да донира за Гевгелија. Mинатата година тие донираа специјално опремено возило за лица со посебни потреби кое го користат за патувања, настани, екскурзии штитениците од Дневниот центар во Гевгелија и Здруженијата на инвалидски организации од Гевгелија. Фондацијата „Ице Бегов“ го изгради како сопствена донација и првиот инклузивен парк во Гевгелија, во дворот на Пионерскиот дом.
