По 10 дневно затишје на пожарите во гевгелиско, повторно гореше природната вегетација во поткожувјето, овој пат во близина на село Давидово, во подножјето на Кожуф планина, гореше прнар и сува трева.
На местото на опожарувањето веднаш интервенираше тим на ТППЕ Гевгелија, по дојавата за пожар во 17:45 часот, вчера 16 август. Екипата за интервенција составена од 4 пожарникари и две противпожарни возила целосно се справи со пожарот по тричасовна акција на терен. Пожарот беше целосно ликвидиран во 21 часот, а екипата вратена во своето седиште во 21:10 часот.
Ова е прва интервенција во август после 10 дневно затишје на пожарите во гевгелиско. Последниот случај беше на 6 август со големиот пожар во близина на с.Негорци кога беа загрозени и куќите пa мораа итно да интервенираат воздушните сили испратени од ЦУК. Куќите беа спасени благодарение на брзата интервенција на ТППЕ Гевгелија, хеликоптерот кој гаснеше од воздух и локалните жители од Негорци кои направија земјен штит меѓу пожарот и куќите.
Денеска повторно гори депонијата во Дојран. Овој простор гореше и на 30 јули и опожари семејни имоти, гаражи, помошни простории, а за спас на населбата итно интервенираше хеликоптер ангажиран од ЦУК.
На терен денеска се противпожарните сили на Доброволното ПП друштво од Дојран.
Од ТППЕ Гевгелија велат дека не е барана помош од нив да се вклучат во интервенцијата поради тоа што нема опасност од опожарување на блиските населби „Карач“ и Нов Дојран, бидејќи во пожарот пред 19 денови изгоре голема површина од околниот простор околу депонијата. „Нема што да гори, освен ѓубрето од депонијата“ – Велат од ТППЕ Гевгелија.
Жештините уште траат, а опасностите од пожар не запираат. Причина кај сите овие пожари на отворено е човечкиот фактор кој изгледа уште не се свестил колкава штета предизвикува со пожарите, свесно, или несвесно, но во секој поглед НЕОДГОВОРНО!
