Советот на општина Гевгелија денеска на вонредна седница ќе расправа за доделување финансиска помош за настраданото население од збратимената општина Јабланица во Босна и Херцеговина, каде што поради обилните врнежи и поплави, ноќта помеѓу 3 и 4 октомври, срушени се повеќе куќи, прекинати сообраќајници, а животот на тамошното население е драстично сменет и отежнат.
Средствата ќе бидат наменети за санирање на последиците од елементарната непогода што ја задеси Босна, а најмногу пределот на општина Јабланица, каде што се затрупани од наносите со вода, земја, кал и камења многу куќи, а повеќето се и срушени. Најтешка е состојбата во Долна Јабланица каде се сомнева дека каменолом ја предизвикал трагедијата во населбата која е целосно затрупана со отпад од гранит.
Се предлага, на денешната 48-ма седница која се свикува вонредно, да биде донесена Одлука за одвојување 1.230.000 денари од Буџетот на Општина Гевгелија за помош на збратимена Јабланица.
Седницата ќе се одржи со почеток во 15 часот, а се очекува на истата советниците да ја искажат братската грижа со народот кој е погоден од елементарната непогода, со кој дели братски одлуки за соработка, унапредување на локалниот спортски, културен и економски живот, деценија наназад.
На ред е да се покаже соработка дека Гевгелија соработува за поткрепа на ЖИВОТОТ во братска Јабланица!
Според последните информации, најмалку 20 лица го загубиле животот во катастрофалните поплави во БиХ, најмногу во Јабланица, 14 лица. Поплавите и свлечиштата, исто така, предизвика и огромни материјални штети во регионот.
Локалното население е евакуирано од нивните домови, а спасувачките екипи работат ден и ноќ за да им помогнат на погодените.
Началникот на општина Јабланица, Дамир Шабановиќ, прогласи Ден на жалост, кој ќе трае до 8 октомври.
