Традиционалната манифестација на печење домашна ракија Валандовската „Ракијада“ се одржа и годинава под покровителство на Општина Валандово.
На познатата јавна локација, на отворениот базен во Валандово, беа поставени 20 казани за печење ракија со исто толку екипи кои се натпреваруваа во производство на жестоката капка.
Додека траеше постапката на приготвување ракија, за бројните посетители се изведуваше културна програма на која настапија локални изведувачи од Валандово и валандовско, детски фолклорни групи, ветерани фолклористи, „Распеани Валандовчани“ локален оркестар, а домаќинките и вредните валандовчанки изложија домашни изработки, плодови, месени пити и сокови од поднебјето на Валандово.
Откако ракијата беше готова стручно жири оцени дека победници на овогодинешната „Ракијада“ се Иван Калковалиев и Крсте Арабаџиев. Организаторот им додели Признание за квалитетно подготвената ракија и пригодни награди. Благодарници за учество добија сите натпреварувачи на манифестацијата.
– „Валандовската Ракијада е исклучително важен настан за нас. Ракијадата е наша вредност и посебност. Ја чуваме автентичноста на локалната заедница, ги промовираме нашите земјоделски производи и ја негуваме семејната традиција за производство на лозова ракија“ – изјави градоначалникот на Валандово, кој од името на оптината какопокровител на манифестацијата ги посети натпреварувачите покрај казаните и изложувачите на домашни изработки и плодови.
Настанот привлече посетите од околните општини, а беа посетени и од гевгеличани.
