Советот на општина Гевгелија по втор пат ќе одлучува за одвојување буџетски средства за исплата на парична награда на вработените пожарникари во ТППЕ Гевгелија за вонредно вложните напори летово да се справат со огромниот број пожари на отворен простор во Гевгелија и на територијата на својата надлежност, Богданци и Дојран.
Вкупно 20 пожарникари треба да добијат по 11.000 денари со вклучен персонален данок за исплата на средствата, или вкупно 220.000 денари ќе бидат одвоени од Буџетот на општина Гевгелија за 2024 година.
Оваа награда доаѓа по предлог од советничката група на СДСМ и советникот Николчо Петров од партијата Левица. И двата предлога дојдоа до административните служби на општината во ноември 2024 година, беа поставени на дневен ред на ноемвриската седница на Советот и истата точка беше симната од дневниот ред заради додадени имиња за исплата на парична награда за комуналните работници и вработени во Шумското стопанство „Кожуф“ Гевгелија, од страна на администрацијата.
Советникот на Левица побара точката да биде симната од дневниот ред и да се планира исплата само за пожарникарите кои гаснеле пожар, како што е во предлогот иницијативата за дополнување на дневниот ред, а не и за комуналците и вработените на Шумското стопанство кои волонтирале во гаснењето пожари.
Советникот од ЛДП на 52 седница побара да се симне точката од дневниот ред затоа што наместо 20 пожарникари службите во одлуката додале уште имиња и списокот пораснал на 110 лица.
– „Ова повеќе мириса на коруптивно делување отколку одлука за парична награда“- истакна Петар Апостолов од говорницата на Советот.
Советникот од независната листа на граѓани чинот на наградување го нарече „популистички“.
– „Ако толку се грижите за пожарникарите купете им нова опрема за да не одат да гаснат пожари на ризик, качете им ги платите, а не да им давате еднократна награда од 10.000 денари“ – истакна на ноемвриската седница Томе Кичуков.
Советникот Тодор Ристов од СДСМ забележа дека:
– „Одлуката е неизвршна бидејќи службите не утврдиле дека во буџетот нема средства од 960.000 денари за исплата на 70 лица според првиот список составен од пожарникари, комуналци и вработени во ШС, а сега слушам дека списокот пораснал на 110 лица. Значи треба уште пари, а нема таква планирана ставка во буџетот“.
Точката за еднократна парична награда се симна од дневниот ред на 52-та седница одржана во ноемрви 2024 и се испрати на доработка до службите во општина Гевгелија.
Еве го резултатот од доработката: Се предлага нова Одлука со која секој пожарникар од ТППЕ Гевгелија треба да добие парична награда од 11.000 денари со вклучен ПД.
За одлуката да биде законска и извршна треба за неа да се изјаснат мнозинтвото од членовите на Советот на општина Гевгелија на веќе закажаната 53-та редовна седница, што треба да се одржи на 6 декември годинава.
