Девети јануари, трет ден Божиќ, Гевгелија го дочека со празнична рутина, топло зимско време, но не и со најново новороденче за 2025 година.
Во Одделението за Гинекологија при Општа болница Гевгелија со проширена надлежност и денеска нема детски плач, нема новороденче.
Прашавме дали да очекуваме некоја мајка во најава која ја одржува својата бременост во Гинекологија дека ќе треба да се породи деновиве па да се порадуваме дека Гевгелија продолжува да расте со нов станар, нов жител, иако во пелени.
Одговорот од дежурните служби на Гинекологија е дека нема трудница во одделението што чека пород, нема тим за породување, сите трудници се упатуваат во породилиштата во другите медицински установи во државата.
Ако ваква е состојбата годинава, тогаш каква беше минатата 2023 година на тема новороденчиња во Гевгелиската Болница?
Ни одговорија дека во Одделението за Гинекологија во Гевгелија, лани, во 2024 година се породиле само четири новороденчиња од кои 2 машки и 2 женски. Рамноправност на половите, нема што.
Во годината 2023 во Општа Болница со проширена надлежност Гевгелија се родени 16 бебиња, од кои 6 машки, а 10 женски, извести GevgelijaNet.com. Тоа значи за три пати намален бројот на породувањата во 2024 во однос на 2023 година, извршени во Општа болница Гевгелија.
Ова е мала бројка на новородени во гевгелиската болница заради непостоење на комплетен медицинско-гинеколошки-анестезиолошки тим за изведување на пороѓај, царски рез, или породување кај тешки форми на бремености.
Сепак Гевгелија и регионот на надлежност на Општа болница Гевгелија имаат свои принови, од страна на родилки од југот кои својот чин на мајчинство го доживеале во некои од родилиштата во државата.
Точната бројка на новородени во 2023 година е 237 бебиња. За 2024 година не дознавме. Колку бебиња ќе се родат годинава во Гевгелија не знаеме; Без комплетен медицински тим треба да се запрашаме дали ќе има бебиња?
Ова не е прашање само за мајките, за трудниците, за младите родители, ова е прашање за здравствениот систем кој се’ повеќе пати од недостаток на специјалистички кадар, како во државата, така и во Гевгелија.
