Прогнозите за студениот бран во текот на ноќта со врнежи од снег на повисоките места, а во текот на денот и на пониските места во Македонија се остварија. Снег има од 1 см во Струмица, до 59 сантиметри на Попова Шапка (податок од 8:30 од УХМР. Нашите соседи од Богданци и Дојран објавуваат фотографии од снежната идила кај нив. Само Гевгелија и’ одолева на снежната прогноза.
Освен убавата глетка, на одредени места снегот донесе и проблеми, како заледеност на коловозот на автопатот „Пријателство“ кај с.Миравци, па од утрово тешките товарни возила се пренасочуваа преку стариот пат Удово – Демир Капија, јави ЦУК 08:50 часот.
РЦУК – Струмица, известува дека сите патни правци на Струмичкиот регион (Струмица, Босилово, Василево, Ново Село, Радовиш, Конче, Валандово, Гевгелија, Богданци, Дојран) се проодни во зимски услови. Под РЦУК припага и Гевгелија, што значи проодноста на патиштата во Гевглија е солидна.
Гевгелија е денеска најтопол град во државата со измерена температура од 1,1 степен Целзиусов, а најстудено е на Попова Шапка со температура од – 8,5 степени (податок од 13 часот). Во Гевгелија во изминатите 24 часа наврнаа 4 l/m2, а од утрово до 13 часот уште 1 l/m2.
ВРЕМЕТО ДЕНЕСКА:
Облачно и студено насекаде со врнежи од снег, а на места, особено во западните делови ќе бидат обилни (локално над 40 л/м2). На повеќе места ќе се формира снежна покривка, а на планините значително ќе се зголеми (локално и над 50 см). Позначителна снежна покривка (над 20 см) ќе се формира и во југозападните делови. Поради ниските температури и засилениот северен ветер ќе има појава на голомразица и снежни наноси. Максималната температура ќе достигне од -3 до 4 степени.
