Советот на општина Гевгелија вчера на одржаната 56-та редовна седница го верификуваше мандатот на новиот член од редовите на ВМРО-ДПМНЕ, Лазар Шуклев.
Советот на Општина Гевгелија го верифицираше мандатот на Шуклев согласно издаденото Уверение за избор на нов член од страна на Општинската изборна комисија – Гевгелија и по констатирањето за престанок на мандат на претходниот член на Советот, д-р Патрик Матх.
Имено, д-р Матх на претходната 55 седница поднесе оставка од причини што беше именуван за в.д. директор на ЈЗУ Општа болница Гевгелија со проширена дејност, а според Законот за локална самоуправа не може да обавува и раководна и самоуправна функција како член на локалниот општински Совет.
Лазар Шуклев доаѓа од Изборната листа за советници од ЛОИ 2021 година на партијата ВМРО-ДПМНЕ Гевгелија и беше позициониран на 10-то место.
Роден е 22 јули 1940 година и со своите 84,5 години е реално најстариот избран претставник во Советот на општина Гевгелија, од постоењето на локалната самоуправа до сега.
Со оставката на Матх и верификацијата на мандатот на Шуклев односот на партиските сили во Советот на општината останува ист.
Матх од почетокот на функционирањето на овој советнички состав ја извршуваше и функцијата Претседател на Советот. Со оставката и напуштањето на Советот, на негово место за оваа функција мнозинството советници вчера одлучија да му ја доверат функцијата Претседател на Советот на Ѓорги Попов, досегашен член на Советот, исто од редовите на ВМРО-ДПМНЕ.
Инаку, ова е втора смена во советничките редови на оваа партија. Претходно во август минатата година по оставката на Слаѓана Стаменковска, советничкото место го пополни Ивана Чабулева.
Од ОИК Гевгелија изјавуваат дека се очекува нова, трета по ред оставка на советник од редовите на истата партија кој веќе извршува друга функција, што се коси со одредбите од Законот за локална самоуправа и спречувањето на извршување двојни функции на претставниците на власта.
