Илјадници граѓани вечерта на 18 март се собраа на плоштадот Македонија во Скопје за да им оддадат почит на 59-те жртвите во пожарот во дискотеката „Пулс“ во Кочани. Собирот започна со 16 минутен молк. Масата од народ упати светлосен поздрав кон ѕвездите како последен поздрав на загинатите во пеколната ноќ во дискотеката „Пулс“. Вечерта на 15 кон 16 март во пожар во дискотеката „Пулс“ загинаа 59 млади луѓе, а над 180 се повредени.
Ѕвезденото небо беше направено од светилките на мобилните телефони на граѓаните на плоштадот, за новите ангели, да изразат жал за нивната загуба и да изразат поддршка и грижа кон семејствата на загинатите во овие најтешки моменти.
Скопје тагува, Скопје се моли. Скопје, молчи, ама не премолчува! Оддавање на почит кон починатите 59 ластовички, кои не запролетија!
„Грутка во грлото, солза во очи, не сте сами“, „Со крвави раце ги броите парите“, „Кажи ми како без тебе да бидам“, „Од алчност, децата ги претворивте во пепел“, „Народот страда додека системот одмара“, „Заради гнилиот систем, гниеме млади“, се дел од пораки на транспарентите на насобраните граѓани.
Јавни собирања и оддавање почит имаше и во други градови во државата: Битола, Велес, Струга, Струмица…. и други. Еве дел од тамошните јавни собири.
