Денес Дојранското Езеро се разбуди за 1 сантиметар понизок од вчера, со 7 сантиметри понизок водостој од „0-та“ котата. Тоа е всушност 127 сантиметри пониско ниво на езерото од договорениот минимум со соседот, Р.Грција.
Нивото за одржување на биолошкиот минимум на езерото, т.н. „0-та“ котата беше достигната на 7 октомври и се одржуваше до 14 октомври со малите повремени врнежи од дожд во текот на претходната недела и тивкото безветровито време. Дождот изминатиот викенд остави само 8 литри/1м2 водена маса, што не беше доволно да се запре одот надолу на нивото на езерото.
Отсуството на дождовите и ветровите со брзина од над 60km/h си го зедоа „данокот“ од езерото со намален водостој за цели 7 сантиметри во текот на изминатите седум дена.
Хидросистемот кај Ѓавото „За спас на Дојранското Езеро“ е активен и од него се испумпува вода со капацитет од 100 литри во секунда, кое очигледно не е доволно штом трендот на опаѓање на нивото на езерото продолжува.
Ова се официјални податоци измерени од овластено лице на УХМР.
Злате Талески од Дојран вели дека најголема штета за езерото во овој период е сушната сезона без дождови и присутниот ветар. Ноемврискиот просек на дождови за Дојран изнесува 240 литри/1м2 што е доволно за пораст на цели 20 сантиметри на нивото на езерото.
Дали ќе се чека дождовите да го спасат езерото, или ќе се покачи дотурот на вода од ХС кај Ѓавото со 200 литри во секунда како што беше на почетокот од пуштањето во функција на Системот на 25 јули годинава? Тогаш нивото на езерото беше 33 сантиметри над „0-та“ котата, па алармот за спас на Дојранското езеро беше вклучен на време.
Денес, езерото опаѓа под котата на загрозување на флората и фауната во него и севкупниот езерски биодиверзитет, jа премина „0-та“ котата и продолжува со одот надолу…
Дождовните облаци чекаат да се наполнат, да се позиционираат, можеби ќе навратат и до Дојран, но Дојранското Езеро нема време за чекање!
