Организациониот тим на најмасовните празнични трки во Гевгелија „ November Run 2023“, Атлетскиот клуб „7-ми Ноември“ остварија средба со градоначалникот на општина Гевгелија со цел да искажат благодарност за градот кој ги ослободи улиците за тркачите, атлетичарите, децата и учесниците на првата инклузивна трка во Македонија.
Градските улични трки го исполнија градот со над 2.000 учесници-тркачи кои ги преплавија празнично улиците на Гевгелија со младост, радост, ведрина и спортско бодрење. Освен тркачите не малку бројни беа и набљудувачите кои на ист начин празнично раздвижени ги следеа атлетските случувања низ улиците на Гевгелија.
Тоа беше на 5 ноември, претпразнично одбележување на Денот на општина Гевгелија 7 Ноември, денот на ослободувањето на Гевгелија.
Насмевките на учесниците, победниците, среќните поддржувачи на своите омилени учесници на трката веќе ги објавивме. Сега ви ги претставуваме организаторите на тој празничен спортски митинг во Гевгелија: Драган Ристов, Тоше Петков, Тодор Анчев, Никола Ковачев, (од лево на десно на фотографијата), членови на организациониот тим на „ November Run 2023“ и воедно основачи на АК „7-ми Ноември“ Гевгелија.
Во организацијата на ноемвриските трки во Гевгелија учествуваа уште Марјан Ризов и Игор Коцевски кои не беа на средбата во Општината, а се исто така членови на Гевгелискиот Атлетски клуб, воедно иницијатори и основачи на АК „7 Ноември“ заедно со горе споменатата четворка
На средбата, беа сумирани впечатоците од одржаната трка. Градоначалникот Сарамандов го изрази своето задоволство од организацијата и масовноста на трката затоа што со нејзиното одржување Гевгелија се вбројува во центрите на масовниот спорт во државата, со интенција да привлечат повеќе странски учесници и заживување на спортскиот туризам во Гевгелија.
– „Од средбата сме многу здоволни. Веднаш добивме покана за прием кај Градоначалникот и ни’ беше посочено дека очекуваат од наст трките да бидат традиционални, не’ поддржуваат во ова и сакаат да прерасне во традиција на градот“ – изјави за Gevgelijanet Тодор Анчев.
Гевгелиските градски трки се поддржани од локалниот буџет преку Програмата за спорт на општина Гевгелија за 2023 година.
За спортските ентузијасти кои го наполнија градот со спортисти, деца, инклузивни лица, со празнична река од тркачи и набљудувачи заслужуваат поддршка и од општината, и од државните спортски фактори.
