Со донесените измени на постоечката Одлука за ограничување на цените на основните прехранбени производи, на предлог на Министерството за економија, Владата на РСМ го продолжи ограничувањето на цените до 29 февруари 2024 година, наместо до 31 јануари 2024 година.
Во Одлуката опфатени се oпределени видови основни прехранбени производи и тоа: ориз, брашно, леб и други пекарски производи, бисквити, наполитанки, тестенини, месо и производи од месо, млеко, јајца, сирење, кашкавал и други млечни проиводи.
Владата донесе и Одлука за изменување на Одлуката за определување највисоки цени на одделни производи во трговијата на големо и трговијата на мало.
Со измените на постоечката одлука, исто така на предлог на Министерството за економија, се продолжува до 29 февруари, од претходно утврденото ограничување на цените до 31 јануари, за: минерална негазирана и газирана вода и негазирани и газирани пијалоци (сокови), во определени пакувања и светло пиво.
