– „Пријатни средби со граѓаните на Гевгелија, кои што имав можност да ги сретнам за време на мојата посета на градот“, вели Претседателот на државата Стево Пендаровски за впечатоците од денешната посета на нашиот град Гевгелија и неговите средби #ЛицеВЛице со гевгеличани.
Посетата немаше институционален карактер – предмет на интерес беа граѓаните, како тие се справуваат со своите животни потреби, граѓанските активисти, самовработените лица, хуманитарните активности преку најбројната и најстара организација кај нас Црвениот крст на Гевгелија.
Претседателот најпрво го посети новоизградениот објект на Црвен Крст Гевгелија, каде имаше средба со најбројната група волонтери и со претставниците на ОО ЦК Гевгелија. Тие му ги искажаа своите досегашни ангажмани, а претседателот испорача честитки за високата мотивираност на општинската организација во поттикнувањето на позитивни процеси во овој регион. Особено ја истакна посветеноста на младите хумани луѓе коишто имаат силен придонес кон добросостојбата во нашето општество.
Посета на Претседателот во запознавањето на успешни лица во Гевгелија беше и примерот со самовработување на Мартина Стојчевска која стартуваше свој бизнис за организација на настани, декорирање и изработка на подароци, во исклучително специфични услови наметнати од пандемијата.
Претседателот го посети нејзиниот работен простор и продажно-изложбен салон и запознавајќи се со работата на младата Мартина испорача „Честитки за нејзината успешна бизнис приказна, основана со помош на грант од Програмата за Самовработување реализирана од Министерство за труд и социјална политика и Агенција за вработување со поддршка од UNDP MK“.
За уметничките традиции на Гевгелија Пендаровски беше запознаен со разгледување на колекцијата на графичката колонија „Гевгелија“, основана во далечната 1980 година, како единствена од ваков вид на територијата на поранешна Југославија. За начењето на графичкиот израз, како и со сложениот процес на создавање на ваквите дела претседателот беше запознаен од уметникот Атанас Крстов.
И граѓаните на Гевгелија во случајните средби со Претседателот имаа свои искажувања, но и желби да ја вековечат средбата со „селфи“.
