Вчера, денес и во текот на утрешниот ден, во земјава ни пристигнува прав од Сахара. На Балканот сахарскиот прав пристигнува од Италија, па преку Хрватска стасува и во земјава.
Први со предупредување за сахарскиот прав излегоа хрватските метеоролози, а во текот на вчерашниот ден и нашите метеоролози предупредија за зголемената концентрација на прав во воздухот.
Овој феномен е доста честа појава кај нас, доколку се земе предвид фактот што само пред пет месеци, односно во септември ја имавме истава појава. Веројатно за многумина не претставува ништо посебно, меѓутоа добро е да се укаже на тоа какви последици остава и кои мерки треба да се преземат за заштита од него.
– Сахарскиот прав е појава што е присутна над територијата на целата држава и тоа не се случува многу ретко. Кај нас се случува неколкупати годишно. Како што е вообичаено, тоа значи дека ќе се зголемат концентрациите на ПМ10 честички и тоа ќе трае неколку дена. Концентрацијата на овие честички ќе биде зголемена над целиот Балкан – велат метеоролозите.
Милиони тони честички прашина секоја година доаѓаат во Европа од северозападна Африка. Честичките се богати со железо и фосфор, негативно влијаат на квалитетот на воздухот и ја намалуваат видливоста.
Дали е правот опасен по здравјето на човекот?
Правот во воздухот, има тенденција да го намали целокупниот квалитет на воздухот за дишење, а посебно влијае на ПМ10 концентрациите.
Токму затоа, кога е зголемено количеството на сахарски прав во воздухот, важат истите препораки како и кога воздухот е загаден од други причинители. Во такви случаи, на граѓаните им се препорачува носење заштитни маски и да се избегнува подолг престој на отворено.
Секојдневната или честа изложеност на ПМ10 честички, пак, може да предизвика сериозни здравствени проблеми, а кај некои и смрт. Кардиоваскуларни импликации, како аритмии, срцеви удари, астма и бронхитис, се само мал дел од влијанијата што загадениот воздух ги предизвикува кај граѓаните.
Сепак, прогнозата е дека изложеноста на Сахарски прав во Македонија ќе биде три дена. Да се заштитиме со одбегнување подолг престој на отворено, за минимализирање на можни последици од неквалитетниот воздух со прав од Сахара.
