По речиси дводецениска пауза повторно се обновува фестивалската сцена за најмладите во Гевгелија со заживување на активностите на Детскиот музички фестивал „КАЛИНКА“.
Уметничкиот директор на фестивалот, Александар Стојанов за GevgeijaNet извести дека од утре почнуваат аудициите за избор на учесниците на фестивалот:
– „Аудицијата е закажана за утре, среда 1 март и задутре, четврток 2 март во Народниот Театар Гевгелија, со почеток во 18:00 часот. Фестивалската комисија треба да избере 20 солисти на новите песни од „Калинка“ и 100 членови на детскиот хор „Калинка“. Заинтересираните даца е потребно да испеат дел од својата омилена песна, или рефрен, не подолго од 60 секунди, по сопствен избор“ – информира Стојанов.
Тој ни открива дека Фестивалската сцена за новите „калинки“ ќе биде отворена на 19, 20 и 21 мај 2023 година, а недела дена претходно ќе бидат одржани гостувања на „калинките“ низ училиштата, градинките во општината и регионот.
– „Нема да изостане ниту телевизиското емитување на фестивалот на програмата на МТВ. Веќе е склучен договор со Македонската Радио Телевизија и тие имаат обврска да ги снимат гала вечерите на фестивалот, да ги режират и емитуваат на својата програма. Најавуваме дека на 21 мај детскиот фестивал ќе биде на отворена сцена на градскиот плоштад во Гевгелија, а децата со песна ќе настапат за градот, пред гевгелиската публика“ – ги обзнани плановите за фестивалските случувања уметничкиот директор Александар Стојанов за GevgelijaNet. .
Новиот кам-бек на „Калика“ е поддржан и од локалната самоуправа во Гевгелија преку Програмата за финансирање на културните активности од значење за општина Гевгелија за 2023 година.
