Шумското стопанство „Кожуф“ од Гевгелија за претсојната грејна сезона привршува со испораката на договорените количини огревно дрво за граѓаните и правните лица.
Од вкупната годишна сеча остануваат за испорака уште 300 метри просторни дрва да се достават до нарачателите.
– „Привршуваме со испораката на договрените количини огревно дрво согласно склучените договори што ги има направено Подружница „Кожуф“ спрема нарачателите, уште во март-април на почетокот од годината. Нарчатели се индивидуалните граѓани, семејни корисници, здружението на пензионерите, синдикалните организации, правните лица. Засега на залиха имаме уште 300 метри просторни даб. Буката веќе е испорачана„ изјави за GevgelijaNet директорот на ШС „Кожуф“ Гевгелија Саве Марачков.
Тој додаде дека:
– „Годишната дрвена маса која ја испорачуваме е 18.000 метри просторни дрва. Овде спаѓаат и селските сечи, со склучени договори за одобрена сеча со жителите од населените места, како во Миравци, Конско, Дојран, Николиќ и т.н. “ – посочи Марачков.
Освен продажбата од сопствениот склад за дрва Шумското врши продажба и кон приватни складишта за дрва, од општината и регионот, кои снабдуваат со огревно дрво други потрошувачи.
Годинава цената на метар просторен бука се продаваше по 2.850,- денари, а метар просторен даб се продаваше за 100 денари поскапо, по цена од 2.950 денари.
И годинава изборот на природниот огрев од дрвена маса за голем дел од граѓаните и понатаму е најекономичниот избор за затоплување на домот во текот на зимските месеци.
