Металната фигура која со години стоеше кај Амамот, остаток од првиот агрегат што ја снабдувал Гевгелија со електрична енергија од 1931 година па се’ до ослободувањето, пред 40 дена беше преместена во паркот пред Народниот театар во Гевгелија. Без помпезност, без сечење црвени ленти, радалицата стоеше повеќе од месец дена пред театарот без никакво обележување за тоа што важност има објектот.
Денеска без никаква најава радалицата е откорната од постаментот пред театарот и вратена каде што законски припаѓа, во просторот на Амамот во Гевгелија.
Незаконската 40 дневна селидба беше прекината на барање на НУ „Музеј“ Гевгелија која ги потсети општинските власти дека објектот е во надлежност на „Музеј“ Гевгелија и дел од проектот за обнова, оградување и партерно уредување на Амамот со донација од турската општина Карач, изработен од 2011 година.
Амамот и целиот објект и обележја во неговиот простор се заштитени со класификација за културно наследство, па и радалицата како симбол на периодот кога Амамот служел за производство на струја во раните 30 години на минатиот век.
Денеска грешката е исправена – радалицата се врати „дома“ во просторот на „Амамот“. Законот за заштита на културното наследство е испочитуван.
Гевгелија треба да памети дека историските објекти од времето на Отоманското царство, Амамот, кое се користел како турска бања, па градска бања, помеѓу двете светски војни добил и технолошко значење за Гевгелија станувајќи простор каде бил сместен првиот агрегат за производство на електрична енергија.
Збратимената општина Карач од Турција донираше средства за обнова на Амамот кој сега е Галерија за потребите на НУ „Музеј“ Гевгелија, а радалицата како историски експонат гордо сведочи за едно технолошко-развојно време на Гевгелија.
Да се памети! Нашата историја е и наше богатство кое треба да се чува!
GevgelijaNet реагираше за ова уште на почетокот.
