Двајцата херои од Дојран, другарите Бранко Караколев и Самир Патрон, доброволно го исчистија каналот од ХС „За спас на Дојранското езеро“ што кај месноста Топлец се влева во езерото. После оваа нивна самоиницијативна акција тие го исчистија и паркот околу каналот, го фрлија растителниот отпад, го исчистија паркот кај Саат кулата од 14 век во Стар Дојран.
Иако чистат веќе еден месец, доброволно и без надокнада, никој од граѓаните не им се придружи за помош, а илјадници, илјадници пораки за поддршка и БРАВО добија на социјалните мрежи.
Хуманитарната платформа ЕCrowd.mk отвори донаторска сметка за нив со цел граѓаните да ја наградат нивната самоиницијативност, акција за чистење на Дојран и граѓанска свесност за потребата од чување на природата и уредување на урбаниот простор кој е наменет за граѓаните на Дојран и посетителите на овој јужен езерски бисер.
Можете да ја поддржите кампањата со донирање на 100 денари, до максимално 6.000 денари во еден ден, како поддршка за Бранко и Самир да ги продолжат нивните акции за чистење и уредување.
Буџет на кампањата е лимитиран на 700.000 денари, со временска рамка од еден месец. До сега се собрани 5.405,- денари.
Можете да се придружите на кампањата на овој ЛИНК да дознаете нешто повеќе за нивните акции и да донирате симболични средства за поддршка на еколошките акции на двајцата доброволци од Дојран, инаку невработени лица кои започнаа со максимата „Џабе работи, џабе не седи“ и би сакале да продолжат и со други еколошки акции, за доброто на Дојран, на езерото, на заедницата, на сите нас. Но, ете треба и некој алат да се купи, да се замени, гориво за тримерите со кои работат, механизација за поголемите зафати за чистење на отпад и слично.
Донаторскиот фонд можете да го поддржите и со повик на бројот 143 999 кој се однесува за граѓански акции, за групно финансирани кампањи за социјалните случаи и олеснување катастрофи и природни непогоди.
Самир Патрон (33 г.) и Бранко Караколев (27) вложија едномесечен доброволен труд за Дојран. Сега се спремаат да почнат со чистење на Јалмскиот канал кој носи вода од месноста Топлец до каналскиот систем од ХС „За спас на Дојранското езеро“ и се влева во системот од Ѓавото, па двата дотека заедно носат вода со кое се полни Дојранското езеро. Каналот е долг околу 300 до 350 метри, запуштен е, има земја, обрасната трева, наноси од гранки, растенија. Тоа двајцата херои од Дојран сакаат да го исчистат за езерото да има вода, да заживее Дојранското езеро и Дојран со него.
Да им дадеме поддршка на овие наши локални херои!
