На годинашниот јубилеен 20-ти Меѓународен музичко-инструментален фолклорен фестивал „Велигденски средби“ во организација на ФА „Китка“ од с.Ораовица, нашето културно-уметничко друштво „Негорци“ од Негорци ја освои наградата за најдобра народна носија.
На фестивалот годинава учество зедоа -19 културно-уметнички друштва од државата и странство, (Македонија, Србија, Косово, Албанија и Бугарија), а настап имаа вкупно 576 учесници. Настанот се одржа вчера, недела 12 мај, во манастирот „Свети Ѓорги“ село Ораовица, радовишко.
Во оваа конкуренција од фолклористи КУД „Негорци“ од Негорци, гевгелиско ја освои наградата што ја доделува стручното жири за „Најдобра автентична народна носија“.
- „Носиите со кои ја игравме кореографијата „Лазаренки“ која потекнува од овој крај, гевгелиско, од селата Петрово и Миравци, ја доби наградата за „Најдобра носија“. Носиите кои ги носеа девојите на настапот се автентични, набавени од овие две села за потребите на КУД „Негорци“, така што некои од нив се стари и 100-на години“ – изјави за GevgelijaNET уметничкиот директор на КУД „Негорци“ Ѓорги Јованов.
Освен кореографијата „Лазаренки“ негорските фолклористи на фестивалската сцена настапија и со две егејски ора „Софка“ и „Саракино“. И овие кореографии беа одиграни со соодветни носии, потенцираше уметничкиот директор Јованов.
Инаку на Фестивалот беа доделени и Гран При награда која отиде за членовите на КУД „Панче Пешев“ од Куманово, потоа награда за „Најдобра изведба“ која ја освои КУД „Китка“ од село Истибања и најдобра кореографија за КУД „Калчаник“ од Качаник, Косово.
За нашата македонска автентична народна убавина зборуваат и фотографиите, светот го препознава нашиот колорит, музикален фолклор и со право не’ наградува.
Честитки на КУД „Негорци“ за презентацијата на нашето фолклорно богатство.
Нека е гордост и за селата Петрово и Миравци кои создале, сочувале и негувале со години таква фолкорна автентика.
